‘Stel haar eerder aan as om pos leeg te laat’
2009-11-17 22:38
- Artikelopsies
- Deel
- Kry Beeld op
Dit sou beter wees om iemand in ’n pos aan te stel wat nié die SA Polisiediens (SAPD) se regstellende-aksie-teikens haal nie as om dit leeg te laat.
So het mnr. Abraham Johannes Burger, ’n voormalige lid van die SAPD se nasionale evaluasiediens en voorsitter van die aanstellingspaneel, gister in die arbeidshof in Johannesburg gesê in die geding van kapt. Renate Barnard teen die SAPD.
Barnard, bygestaan deur Solidariteit, eis in die arbeidshof dat sy tot posvlak van superintendent bevorder word en voer aan sy is twee keer (in 2005 en 2006) die bevordering geweier op grond van haar velkleur, terwyl die pos vakant gelaat is omdat geen ander geskikte kandidaat gevind kon word nie.
Die polisie se verweer was eergister dat dit hul regstellende-aksie-teikens nog moeiliker sou maak as Barnard bevorder sou word.
Sr.supt. Johannes Ramathoka, hoof van die SAPD se diensbillikheidseenheid in Pretoria, het toe getuig dat haar aanstelling die haal van teikens vir diensbillikheid op posvlak nege, vir superintendente, moeiliker sou maak.
“Daar is reeds oorverteenwoordiging van wit mense op posvlak nege,” het hy voor regter Paul Pretorius getuig.
Burger het egter gister gesê dit sou beter wees om haar aan te stel as om die pos vakant te laat.
“Dan is daar meer polisielede om die werk te doen en iemand kon weer in háár plek aangestel en bevorder word. Boonop is so ’n aanstelling uitstekend vir polisielede se moraal en skep dit by hulle die gevoel dat al hul harde werk nie verniet is nie.”
Ramathoka het gister gesê die feit dat Barnard nie aangestel is nie, is nie diskriminasie nie. “Niémand is in die pos aangestel nie, so daar is nie teen haar spesifiek gediskrimineer nie. Dis nie asof sy kon sê ’n swart persoon is bo haar aangestel nie.”
Adv. John Grogan wou by Ramathoka weet waarom die pos vir alle beamptes geadverteer word as net kandidate uit die aangewese groepe kwalifiseer.
“Is dit nie baie sinies van die polisie nie?”
Volgens Ramathoka is dit prosedure dat alle lede kan aansoek doen en lê die finale besluit by die nasionale polisiehoof.
Barnard het in 1997 ’n kaptein geword en was sedert 2004 verbonde aan die nasionale inspektoraat.
’n Pos as superintendent is in 2005 en 2006 geadverteer en sy het albei kere aansoek gedoen.
Sy het die hoogste punte verwerf in ’n ondersoek deur ’n keuringspaneel. Die keuringspaneel het albei kere aanbeveel dat sy aangestel word, maar dis telkens afgekeur, eers deur die afdelingskommissaris in 2005 en in 2006 deur mnr. Jackie Selebi, oudpolisiehoof.
Die kommissaris is volgens Ramathoka nie verplig om ’n geadverteerde pos te vul nie.