Sterf in ritueel: ‘Duiwel wen nie’
2012-02-21 22:47
“God het Kirsty huis toe gebring. Die duiwel het nie gewen nie.”
So het me. Sylvia Theologo gister gesê oor die aand toe haar dogter Kirsty (18) in ’n vermoedelik sataniese ritueel aan die brand gesteek is.
Sy was gister by die Johannesburgse landdroshof vir die verskyning van vyf jong mans en ’n 16-jarige meisie in verband met die voorval.
Die beskuldigdes is mnre. Harvey Isha (23), Lindon Wagner (21), Robin Harwood (18), Jeremy King (18) en Lester Evan Nathaniel Moody (18), asook die 16-jarige meisie.
Hulle staan tereg op aanklagte van moord en poging tot moord.
Hulle het Kirsty glo op 21 Oktober verlede jaar in die suide van Johannesburg aangeval.
Haar 14-jarige vriendin het brandwonde opgedoen toe sy Kirsty probeer help het.
Kirsty het daarna meer as ’n kilometer huis toe gestap.
Sy is sowat ’n week later dood.
“Hulle het almal na my gekyk en van hulle het hul koppe in skaamte laat sak,” het Theologo ná die beskuldigdes se verskyning gesê.
Sy het gesê die vriendin het vertel wat daardie aand gebeur het.
“Kirsty het vir haar lewe geveg. Sy het hulle geslaan. Sy was so dapper.
“Ek is so trots op haar.”
Die saak is vroeër vandeesmaand uitgestel omdat King en Moody met die direkteur van openbare vervolging onderhandel oor ’n moontlike pleitooreenkoms.
Dié onderhandelinge is nog aan die gang en die saak is gister weer uitgestel tot volgende maand.
Kirsty Theologo