Suur mynwater maak blind

Twee seekoeie wat al agt jaar in radioaktiewe suur mynwater in die Krugersdorp-wildtuin bly, is vermoedelik blind en sal dalk van kant gemaak moet word.

So het Me. Brenda Santon, bestuurder van die Nasionale Raad van Dierebeskermingsverenigings (NDBV) se wildeenheid, in e-pos aan me. Louise Joubert, eienaar van die Sanwild-rehabilitasiesentrum naby Gravelotte in Limpopo, geskryf.

Dié e-pos is aan Joubert gerig nadat Joubert aangebied het om die twee seekoeibulle te laat vang en op haar koste na Sanwild te bring.

Santon het egter gesê die diere is vermoedelik blind (weens die suur mynwater) en sal moontlik van kant gemaak moet word.

Die suur mynwater het hul gesondheid waarskynlik al só aangetas dat hulle nie ’n verskuiwing sal kan oorleef nie, het sy gesê.

Santon het gister bevestig sy weet al langer as ’n jaar van die seekoeie wat in die mynwater leef, maar dat hul kantoor in Johannesburg die saak glo moes ondersoek.

Die ondersoek het vermoedelik doodgeloop, maar is glo verlede week hervat.

Santon het eergister aan Beeld gesê die NDBV het verlede week inspeksie in die Krugersdorp-wildtuin gehou en is “bekommerd” oor ál die wild.

“Die seekoeie word die ergste geraak omdat hulle die grootste deel van die dag in die dam deurbring en aan die mynwater blootgestel is.”

Die NDBV het na foto’s van die diere gekyk en meen die mynwater het albei oë van albei diere moontlik aangetas.

Volgens Santon sal dit dus nie raadsaam wees om die diere na ’n vreemde omgewing te skuif as hulle nie behoorlik kan sien nie.

“Ons sal beslis nie wil sien dat die seekoeie onbepaald in die suur mynwater bly nie,” het Santon gesê.

Joubert het gesê dit is ’n skande dat die NDBV al sedert die begin van verlede jaar weet van die slegte omstandighede waarin die diere in die wildtuin leef en nog niks gedoen het nie.

Sy het gesê sy sal alles in haar vermoë doen om die seekoeie na Sanwild te bring.