Sy vrou kry verniet aandele toe hy vervolger word
2009-11-17 22:38
- Artikelopsies
- Deel
- Kry Beeld op
Mev. Girly Majola-Pikoli het “verniet aandele ter waarde van miljoene rande” in ’n Kebble-maatskappy gekry op die dag waarop haar man die nasionale vervolgingshoof geword het.
Dit was ’n maand nadat ’n bedrogsaak teen mnr. Roger Kebble van die hofrol geskrap is en nooit heropen is nie.
Mnr. Jackie Selebi se regsverteenwoordiger, adv. Jaap Cilliers SC, het dié “feite” gister aan adv. Vusi Pikoli gestel.
Die dag waarop die aandele mev. Pikoli toegeval het, was 1 Februarie 2005. Pikoli het in kruisondervraging erken hy en sy vrou is binne gemeenskap van goedere getroud.
Die aandele is in die maatskappy Bulisango Holdings Beperk. Bulisango se hoofbate was aandele in die maatskappy Simmer and Jack, wat deel was van die groter JCI-groep waarvan die Kebbles die grootste aandeelhouers was.
“Ek het dit nie geweet nie,” het Pikoli getuig. “Sy het my van die aandele gesê, maar ek het nie van die Kebble-konneksie geweet nie.”
Mnr. Glenn Agliotti het vroeër getuig die aandele is sowat R20 miljoen werd.