Testament in e-pos geldig, sê appèlhof

Die testateur (persoon wat ’n testament maak) of getuies se handtekeninge op ’n testament is nie die alfa en die omega oor ’n testament se geldigheid nie.

Die belangrike vraag is: Wat was die testateur se laaste, werklike wense en bedoeling?

Dié deurslaggewende uitspraak het vyf regters van die appèlhof gister gelewer in ’n geding oor die geldigheid van ’n testament wat net in e-pos geskryf is.

Mnr. John van Schalkwyk van Johannesburg, die testateur, het die e-pos-weergawe nie voor sy dood onderteken nie.

Hy het dit net per e-pos aan mnr. Hendrik van der Merwe van Kaapstad, sy boesemvriend, gestuur.

Voor sy dood was Van Schalkwyk en Van der Merwe volgens appèlregters M. Navsa, T. Cloete, B. Shongwe, E. Bertelsmann en J. Ebrahim baie hegte vriende, dermate dat albei onderneem het om hul aardse besittings in nuwe testamente aan mekaar te bemaak.

Geeneen van die mans was ooit getroud of het enige afhanklikes nie.

Dit was ná dié ooreenkoms dat Van Schalkwyk die e-pos-testament aan Van der Merwe gestuur het.

Die Dierebeskermingsvereniging (DBV) was Van Schalkwyk se enigste erfgenaam in ’n testament wat vóór die e-pos-testament opgestel is.

Die DBV het die tweede testament se geldigheid betwis en aangevoer dat dit ongeldig is omdat nóg Van Schalkwyk nóg getuies dit onderteken het.

Die appèlregters het gister gesê die vraag oor ’n testament se geldigheid eindig nie by die formele vereistes in die Wet op Testamente nie.

Dit is dwingend noodsaaklik dat ’n hof ook die testateur se bewysbare laaste wense eerbiedig.