Trane vir SA se duif in Sun City
2012-01-29 21:31
Jy sal dadelik hoor as dáárdie duif kom.
En dis presies wat eergister gebeur het tydens vanjaar se 16de Sun City-miljoendollar-duifwedvlug.
Die gemoedere het hoog geloop onder duifeienaars en geesdriftiges toe die eerste duiwe aankom.
Alle oë was vasgenael op die vertoonskerms in die Sonstad se Superbowl, waar die wedvlug regstreeks uitgesaai is.
Ná sowat nege uur se vlieg het die eerste duif, Rubellos van Duitsland, sy opwagting gemaak.
Sowat 3 500 duiwe van 37 lande is eergister om 06:35 buite Petrusville in die Noord-Kaap vrygelaat, waarna hulle 578 km moes vlieg na die hoksentrum in die Pilanesberg by Sun City.
Kort ná Rubellos het twee duiwe gelyk geland.
Dié twee het lank gehuiwer voordat hulle eindelik dié hok binnegegaan het.
Hulle is deurgaans deur die skare aangemoedig om die hok binne te gaan. Dit was nóg twee plekke vir Duitsland.
Byna ’n halfuur later het die eerste Suid-Afrikaanse duif, Queen of Hearts, in die vyfde plek verskyn. Nommers drie en vier was ook van Duitsland.
Mnr. Saville Penkin, Queen of Hearts se eienaar, het gesê “dis ’n ongelooflike lekkerte”.
“Van dag een was ek by dié wedvlug betrokke. Ek wil sommer huil,” het Penkin, ’n duiweboer van Kaapstad, gesê.
Penkin (72) het bewoë geraak toe hy sy vrou, Denise, bedank vir haar steun en begrip vir die meer as 55 jaar wat hy by duifwedvlugte en duiwe betrokke is.
“Ek is lief vir dié sport en sal dit nooit opgee nie,” het hy gesê terwyl hy sy wenduif op die kop soen.
Queen of Hearts het Penkin $35 000 (sowat R280 000) in die sak gebring.
Rubellos het $200 000 (sowat R1,6 miljoen) vir sy eienaar losgevlieg.
Queen of Hearts is gister, toe die eerste 100 duiwe op ’n veiling van die hand gesit is, vir R12 000 verkoop.
Rubellos is deur die Suid-Afrikaanse duiweboer en deelnemer aan duifwedvlugte mnr. Mark Kitchenbrand gekoop teen R250 000.
Kitchenbrand het ook die Duitse duif Sylt Orpheus, wat tweede was, gekoop – teen R360 000.
Dié duif het die hoogste prys op die veiling behaal.
In 2008 het Kitchenbrand R800 000 opgedok vir ene Birdie.
Dít is die meeste wat tot nog toe vir ’n wedvlugduif op ’n veiling in Suid-Afrika betaal is.
Birdie het destyds die tiende plek behaal.
Mnr. Paul Durand van Nelspruit se duif Baby Blue het negende geëindig.
Duiwe van Australië, Denemarke en Nederland was ook onder die toptien duiwe.