‘Tshwane-beeld as skoon stad word herstel’
2010-03-09 22:44
Dr. Gwen Ramokgopa, uitvoerende burgemeester van Tshwane, het gister te midde van diensleweringoptogte in dié metrogebied in haar stadsrede toegegee “baie moet nog gedoen word”.
Ontevrede inwoners van Soshanguve het eergisteroggend oor swak dienslewering in opstand gekom. Oproerigheid is gister ook in Hammanskraal en Mamelodi-Oos voortgesit.
Ramokgopa het gister haar vyfde stadsrede gelewer nadat sy in 2006 die metromunisipaliteit se leisels geneem het.
Tshwane vier ook sy tiende bestaansjaar nadat 14 munisipaliteite in 2000 saamgesmelt het.
Oor die diensleweringoptogte het sy gesê Tshwane sal moet uitvind waaroor die ongelukkigheid gaan.
In baie gevalle gaan dit oor huise, het sy gesê. Volgens haar is die tempo waarteen Hop-huise gebou en toegeken word te stadig en hou nie tred met die snelgroeiende aanvraag nie.
Sy het daarop gewys dat Tshwane sedert 2006 beduidende suksesse behaal het in die voorsiening van basiese dienste.
Die uitwissing van informele nedersettings is steeds van die hoofprioriteite. Tshwane het sedert 2006 al 33 van die 65 nedersettings in die metrogebied geformaliseer en sal vanjaar na verwagting nog tien uitwis.
Die afgelope staking deur vullisverwyderaars was volgens Ramokgopa onnodig. “Dit was ’n onwettige staking wat die bestuur moes gehanteer het. Ek is nie oortuig daarvan dat genoeg gedoen is (deur die bestuur) om die staking af te weer nie.
“Tshwane is bekend as ’n skoon en leefbare stad en ek wil die publiek verseker alles word gedoen om dié beeld te herstel.”
Sy gaan vanjaar persoonlik verantwoordbaarheid van amptenare eis. “Slegte diens, luiheid, onbekwaamheid en selfvoldaanheid kom ongelukkig na vore wanneer leiers vergeet hulle is daar om te dien.”
Die munisipaliteit se finansies lyk beter, het sy gesê. Die kontantvloeiprobleme van verlede jaar is verby en die oortrokke bankrekening van R700 miljoen is sedertdien betaal, het sy gesê.
Sy het het bekend gemaak dat die Krugerpark- en die Schubartpark-woonstelle, die stadsaal en verskeie museums vanjaar nuwe baadjies gaan kry.