Tuks FM gekap oor sy partytjie
2011-01-04 21:51
- Artikelopsies
- Deel
- Kry Beeld op
Die gort is gaar omdat Die Antwoord op Oujaarsaand by die Voortrekkermonument in Pretoria opgetree het.
Die Antwoord (met Ninja, Yo-Landi Vi$$er en DJ Hi-Tek) was een van die groepe op Tuks FM se Motherless-partytjie.
Die monument het eergister gesê dié groep “se aanstootlike taalgebruik en optrede getuig van swak styl en is nie iets waarmee die monument graag geassosieer wil word nie”.
Genl.maj. Gert Opperman, die monument se uitvoerende hoof, het Tuks FM daarvan beskuldig dat dié stasie nie “oop kaarte” gespeel het in sy aansoek om ’n konsert daar te hou nie.
Volgens Opperman is die monument se groot amfiteater aan die radiostasie verhuur.
Die stasie was verantwoordelik vir die keuse van kunstenaars en die programsamestelling.
Dít is nie met die monumentbestuur uitgeklaar nie, het hy gesê.
Die monument het laat in Desember in die media verneem Die Antwoord gaan optree.
Tuks FM is gekontak, maar was nie bereid om sy kunstenaarskeuse aan te pas nie.
“Tuks FM het gedreig dat ’n eis vir kontrakbreuk en skadevergoeding teen die Voortrekkermonument ingestel sou word indien hulle nie toegelaat sou word om met die konsert voort te gaan nie,” het Opperman gesê.
Mnr. Loutjie van der Merwe, die radiostasie se bestuurder, het gister gesê die stasie het te alle tye die bepalings en voorwaardes van die ooreenkoms “in letter en gees nagekom”.
Al die inligting wat Opperman se personeel aangevra het, is verskaf.
“Die Nuwejaarsparty is op die parkeerterrein langs die amfiteater gehou en nie in die amfiteater nie.”
Opperman het gesê die monumentdireksie en bestuurder spreek hul misnoeë oor Die Antwoord se styl en optrede uit.
“Die direksie en bestuur is baie sensitief oor die gebruik van geriewe wat onder hul beheer val.”
Streng keuring word toegepas, van die senotaafsaal, die mees sensitiewe plek, tot by die amfiteater, die mins sensitiewe.
“Alle aansoeke word deur ’n geriewekomitee op meriete oorweeg, wat ook in hierdie geval gebeur het.”
Opperman het gesê versoeke van Tuks FM om die amfiteater te gebruik, “sal voortaan met ’n groot mate van skeptisisme bejeën word omdat hulle klaarblyklik onverskillig staan teenoor die sensitiwiteite van die Voortrekkermonument”.