VVV kleur hemel blou, toe vuurrooi

Kyk na die video

Middelburg. – “Die lug het skielik helderwit geword. Binne ’n paar sekondes het die voorwerp, wat gelyk het soos ’n sokkerbal met ’n stert, die hemel blou gekleur en toe vuurrooi.”

So vertel mnr. Juan Ferreira (25) van Witbank van die “vreemde vlieënde voorwerp” wat eergister omstreeks 23:00 mense in Mpumalanga, Gauteng en Limpopo se oë laat rek het.

Die gloeiende voorwerp is blykbaar die duidelikste in die Middelburg/Witbank-omgewing gesien.

Volgens mnr. Tim Cooper, direkteur van komete en meteoriete van die Sterrekundevereniging van Suidelike Afrika, was die voorwerp ’n “vuurbal”, afkomstig van ruimtemateriaal uit die asteroïedegordel in die buitenste ruim wat die aarde se atmosfeer binnegedring het.

Heelparty mense het gister die vereniging gebel om te hoor wat presies hulle gesien het.

Volgens Cooper kan dit nie ’n meteoriet genoem word nie omdat dit, sover bekend, nie die aarde getref het nie.

Cooper het gesê die voorwerp het in ’n noordwestelike rigting teen sowat 20?km/h beweeg.

“Dit is nie soseer die voorwerp wat so helder gloei nie, maar die lug wat daaromheen verbrand weens die hoë spoed waarteen die voorwerp beweeg.”

Net een of twee sulke helder bewegende voorwerpe per jaar kan van Suid-Afrika gesien word hoewel sowat 10?000 ton se voorwerpe jaarliks die aarde se atmos­feer binnedring.

Cooper skat die voorwerp was waarskynlik so groot soos ’n vuis, dalk ’n rugbybal.

Ferreira was op buurtwagpatrollie toe hy die voorwerp sien.

“Dit was iets besonders.

“Die voorwerp het konstant teen ’n helling van sowat 45 grade beweeg.”

Mnr. Gido Koegelenberg (22) en sy vriendin, me. Darelle Loots (22), van Middelburg, was op pad huis toe ná ’n werkgeselligheid net buite die dorp toe hulle die vuurbal sien.

“Ek het eers gedink dit is weerlig, maar die hele hemelruim het so helder soos daglig geword.”

Soos Ferreira, sê Koegelenberg, die lug het van helderwit na blou en toe na rooi verander.

Volgens Cooper het die Sterrekundevereniging oproepe gekry van plekke soos Kempton Park, Tzaneen, Polokwane en Hartbeespoortdam.

- Het jy 'n foto hiervan geneem? Stuur dit asseblief na mystorie@beeld.com<p>

Kyk na die video

- Beeld