Valke-hoë, 10 ’n ‘moordbende’

Durban. – Die hoof van die Valke in KwaZulu-Natal en tien lede van die eenheid teen georganiseerde misdaad by Cato Manor is deur die polisie in kennis gestel van voornemens om hulle te skors hangende bewerings dat lede van dié eenheid glo soos ’n moordbende opgetree het.

Genl.maj. Johan Booysen, wat twee jaar gelede as hoof van die Valke in die provinsie aangestel is, het verlede Maandag al op die kennisgewing gereageer nadat hy dit die vorige dag ontvang het. Die speurders by Cato Manor is Vrydag verskuif.

Beeld verneem dat tien lede van die eenheid Vrydag soortgelyke kennisgewings ontvang het.

Kol. Rajen Aiyer, bevelvoerder van Cato Manor tydens die skietvoorvalle, is nié onder dié tien nie.

Die Sunday Times het gister berig bewerings word ondersoek dat 18 polisiebeamptes glo 51 verdagtes onregmatig doodgeskiet het.

Mnr. Carl van der Merwe, Booysen se prokureur, het gesê pogings om die generaal te skors, sal heftig teengestaan word. Booysen is einde verlede jaar deur die polisie aangeprys toe hy na bewering geweier het om te swig voor ’n poging om hom vir R2 miljoen om te koop om ’n korrupsie-ondersoek na ’n R60 miljoen-tender vir polisiekantore te bekook.

Kol. Navin Madhoe van die polisie se aankope-afdeling is in hegtenis geneem toe hy glo R1,4 miljoen in die kattebak van Booysen se motor gesit het.

Mnr. Thoshan Panday, ’n sakeman wat in verband met die beweerde tenderkorrupsie ondersoek word, is later ook in verband met die beweerde omkoop-poging in hegtenis geneem.

Dit het gister aan die lig gekom bewerings dat die Cato ­Manor-eenheid “280” verdagtes vermoor het, is reeds in 2009 deur ’n senior polisie-offisier gemaak in ’n gesprek wat op band opgeneem is.

Daar was in daardie stadium ’n tugsaak teen die polisieman in verband met die ongemagtigde gebruik van polisievoertuie en private werk wat hy sonder toestemming gedoen het.

Die offisier het glo vir Booysen, ’n lid van die vervolgingsgesag en die destydse hoof van die provinsiale speurdiens, as ’n “mafia” beskryf waarvan “ontslae geraak” moet word.

Kol. McIntosh Polela, woordvoerder van die Valke, wou nie kommentaar lewer op die ondersoek na die beweerde polisiemoorde nie en het gesê dit is ’n interne aangeleentheid.

Sluit aan by Beeld se Facebook-bladsy en volg Beeld op Twitter