’N Vermeende renosterstroper is met die lyk van een van
sy makkers agterop sy bakkie by die
Lebombo-grenspos naby Komatipoort aangekeer.
Mnr. Fernandez (Frenk) Ubisi (31) was een van die mees gesoekte
verdagtes in verband met renosterstropery in die
Krugerwildtuin.
Hy is eergisteraand aangekeer nadat inligting oor sy doen en late aan die Valke in Middelburg oorgedra is.
Die polisie het hom by die grenspos tussen Suid-Afrika en Mosambiek
voorgelê.
’n Doodskis met ’n lyk daarin is agterop die bakkie gekry.
Daar is vasgestel die lyk is dié van
mnr. Zacharia Solomone Chichongue (30), ook ’n Mosambieker en ’n vermeende
stroper.
Hy is verlede week naby Malalane in ’n skietgeveg naby die plaas
van mnr. John Hume, ’n bekende renosterteler, in ’n hinderlaag doodgeskiet.
Sy makker het weggekom en is steeds
soek.
’n Polisiebron het gister bevestig dié verdagte is nie Ubisi nie.
Die polisie is sedert Junie 2010 op
soek na Ubisi nadat hy met ’n onwettige jaggeweer
in die wildtuin betrap is.
Hy is destyds op borgtog vrygelaat,
maar het nog nooit weer vir die hofsaak opgedaag nie.
Ubisi was in Desember verlede jaar na bewering weer betrokke by ’n
voorval in die wildtuin toe ’n renoster in die Krokodilbrug-omgewing geskiet
is.
Hy het die polisie weer ontduik.
Ubisi het blykbaar eergisteroggend by die staatslykhuis opgedaag
en Chichongue se lyk opgeëis omdat hy dit terug
Mosambiek toe wou neem.
Toe die polisie Ubisi by die grenspos voorkeer, het hulle glo selfs
die kis deurgesoek om seker te maak dat versteekte renosterhorings nie saam
met die lyk verpak
is nie. Die lyk is daarna na die lykshuis
teruggeneem.
Sers. Gerald Sedibe, polisiewoordvoerder, het gesê Ubisi sal
Maandag in die hof in Witrivier verskyn.