Bure keer huisrowers aan

Twee verdagtes is Dinsdagoggend ná ’n huisrooftog in Sinoville in die noordevan Pretoria, aangekeer nadat lede van die plaaslike polisiegemeenskapsforum (PGF), die polisie, die metropolisie en die publiek saamgespan het.

’n Polisievliegtuig is ook ingespan om na die verdagtes te soek.

Die drama het omstreeks 1:30 begin toe die twee veredagtes by die huis van mnr. Leon van der Merwe in Kurumanstraat ingebreek en hom en sy vrou, Magriet, in hul slaapkamer oorval het. Hulle is met pistole aangehou.

Mnr. Van der Merwe, wat in ’n stadium met die inbrekers gestoei het, het verskeie houe teen die kop gekry.

Mev. Van der Merwe, ’n lid van die plaaslike GPF, het eers kliphard gegil en toe op haar roepradio hulp ontbied.

Die Van der Merwes se seun, ook Leon, ’n Tukkie-student wat in ’n buitekamer slaap, het sy ma hoor gil, ’n donskombers om sy lyf gedraai en deur ’n ruit geduik om te gaan help.

Die booswigte het ontsnap en ’n buurman, het drie skote op hulle geskiet.

In daardie stadium het talle van die bure en lede van die GPF hulle na die toneel gehaas en na die verdagtes begin soek. Die polisie was ook gou op die toneel.

Die verdagtes is later ’n paar blokke verder teen die Magaliesberg vasgekeer.

Die lede van die GPF en die polisie het toegesien dat hulle nie uit die omgewing ontsnap nie. Teen 8:00 is ’n polisievliegtuig na die gebied gestuur en het lank gesirkel in die omgewing voordat die twee rowers opgemerk en uiteidelik aangekeer is.

Lees Woendag die volle verhaal in Beeld.