Vlieënier kry erg seer toe heli ver val
2010-09-06 22:13
- Artikelopsies
- Deel
- Kry Beeld op
’n Vlieënier is in ’n bedenklike toestand in die hospitaal nadat die helikopter waarmee hy gevlieg het, gisteroggend naby Bronkhorstspruit geval het.
Mnr. Henk Badenhorst (32) van Witbank het albei sy bene en van sy ribbe gebreek en van sy rugwerwels is in die slag beseer.
Mnr. Louis Bothma (25), ’n vliegingenieur van Standerton, is ook ná die ongeluk in die Muelmed-hospitaal in Pretoria opgeneem, maar gistermiddag laat ontslaan.
Hy het diep snye aan sy bene opgedoen.
Die ongeluk het gister omstreeks 10:15 tydens ’n toetsvlug net buite Bronkhorstspruit gebeur.
Die helikopter behoort aan Eurocopter.
Volgens mnr. Johan Jordan, eienaar van die maatskappy, het ’n enjinfout die ongeluk veroorsaak.
Jordan het gesê die helikopter het omstreeks 09:30 van ’n private vliegveld in die Wonderboom-omgewing in Pretoria opgestyg.
Bokant Bronkhorstspruit het die helikopter probleme begin ervaar.
“Net buite die dorp, op die Bapsfontein-pad, het die helikopter heeltemal krag verloor en sowat 500 vt. ver geval.
Die helikopter het op sy sy, waar Badenhorst gesit het, geval,” het Jordan bygevoeg.