Vlugteling: ‘Grens aan rassisme’

Die beslissing om aan ’n wit Suid-Afrikaner vlugtelingstatus in Kanada te gee omdat hy meen hy gaan verdruk word as hy hierheen terugkeer, “grens aan rassisme”.

So het adv. Jacob van Garderen, direkteur van Regslui vir Menseregte (LHR), gister gesê in reaksie op die beslissing om aan mnr. Brandon Huntley (31) vlugtelingstatus toe te ken.

Volgens Van Garderen strook die beslissing nie met internasionale vlugtelingereg nie.

“Dis ’n skokkende uitspraak gegrond op onwaarhede en ernstige wanopvattings dat slegs wit mense deur misdaad geraak word en dat die regering niks doen nie en dit stilswyend goedkeur. Dit is onsin.

“Om in die Kanadese reg (aan vereistes vir vlugtelingstatus) te voldoen moet jy bewys jy word polities vervolg, jou lewe is in die gedrang vanweë jou politieke oortuiging of ras en dat die regering niks kan of wil doen nie. Dis nie die geval nie,” het hy gesê.

Huntley (31) het beweer hy is al sewe keer aangeval en swart aanvallers het hom “wit hond”, “setlaar” en “boer” genoem.

Mnr. William Davis, voorsitter van die tribunaal, het bevind Huntley se vrees vir verdrukking deur swart Suid-Afrikaners is geregverdig. Hy het onder meer in sy beslissing na regstellende aksie en swart ekonomiese bemagtiging verwys.

Die beslissing kan egter hersien word.

Hoewel die Kanadese immigrasie-en-vlugtelingeraad nie spesifiek wou kommentaar lewer oor die saak nie omdat dit volgens wetgewing vertroulik is, het hulle gesê die beslissings kan hersien word.

As die Kanadese regering of iemand wat by die saak betrokke is, wil hê die saak moet regterlik hersien word, moet hulle eers magtiging by die land se federale hof kry. Indien hulle magtiging kry, sal die hof oordeel of die saak binne die wet gehanteer is, het mnr. Stéphane Malépart, woordvoerder van die raad, gistermiddag aan Beeld gesê.

Indien die hof bevind die saak is nie binne die wet gehanteer nie, sal dit na die vlugtelingebeskerming-afdeling van die raad terugverwys word.

’n Nuwe raadslid moet dan die saak hersien, het hy gesê.

Huntley het nie gister op e-pos en Facebook-navrae gereageer nie. Mnr. Russell Kaplan, sy regsverteenwoordiger, kon ook nie bereik word nie.

Huntley het wel vroeër op Facebook gesê mense moet die berig oor sy vlugtelingstatus in die Ottawa Sun lees.

“Kyk uit ek’s nou ’n bekende. LOL.” (Dit beteken “lag hard”).

Ene Belinda Burger Morris het op Huntley se Facebook-muur geskryf: “Baie trots op jou om die ander kant van die storie te vertel. Hopelik maak dit mense se oë oop.”

Huntley is deel van Facebook-groepe soos ­“Player 23’s behind our Boks”, “South African braai network” en ­“Canadian South Africans”.

- Beeld