Vuurwarm, sê ‘heat’-lesers
2009-11-22 23:57
- Artikelopsies
- Deel
- Kry Beeld op
Ryk Neethling het reggekry wat selfs die akteur Brad Pitt nog nie kon nie.
Dié goue swemmer is ’n tweede agtereenvolgende jaar as plaaslike heat-lesers se hottest glanspersoonlikheid op die planeet aangewys, het Melinda Shaw, redakteur van dié Suid-Afrikaanse vermaaklikheidstydskrif, gesê.
Sowat 250 000 stemme is uitgebring.
“Dit wys jou net watter blywende krag Ryk het om elke jaar só die harte van Suid-Afrikaners te verower,” het Shaw gesê.
Neethling se jonger suster Jean-Marie het hom Vrydagaand na die Heat Hot 100-party vergesel.
Onder die ander Suid-Afrikaners op die lys is Jaco de Bruyn, die wenner van vanjaar se Heat Man Watch 2009-kompetisie, die model Lee-Ann Liebenberg en die televisiepersoonlikheid Shashi Naidoo.
“Heat Hot 100 onderskei glad nie tussen plaaslike of internasionale sterre nie en vra bloot die lesers om vir hul gunsteling-glanspersoonlikheid te stem.
“Dit opsig self maak sy (Neethling se) toekenning so indrukwekkend,” het Shaw gesê.
Onder die internasionale sterre wat al met die louere weggestap het, is Victoria Beckham in die jaar toe sy met die Rebecca Loos-skandaal deurentyd by haar man David gestaan het, Pitt, Johnny Depp en Wentworth Miller, wie se getatoeëerde karakter in die reeks Prison Break groot aanhang geniet, lui ’n verklaring.
En wat sê die vuurwarm man oor sy jongste status?
Neethling kon dit luidens die verklaring nie glo toe hy die oproep van heat ontvang nie.
“Dis mal. Ek het eintlik gedink julle ouens (heat) is besig om my been te trek of iets. Dit moet ’n grap wees, of hoe? Ek werk so baie dat ek nie eintlik hierdie jaar eers daarbuite was nie.”
* Die volledige uitslae is in heat wat van môre af te koop is.
- Beeld