'Dit was rasmoord'

Lindley. – Die moord op Willemientjie Potgieter en haar gesin was ras- gemotiveerd, het dr. Pieter Mulder gister buite die hof gesê.

’n Groot skare mense het buite die landdroshof saamgedrom, sommige met ’n plakkaat in die hand, nadat hulle “om veiligheidsredes” nie toegelaat is om die klein hofterrein binne te gaan nie.

Mulder, adjunkminister van landbou, bosbou en visserye en VF+-leier, het gesê die mense is daar om hul “misnoeë te wys en solidariteit met die slagoffers te betoon”.

“ ’n Mens het nie woorde om die woede en frustrasie van wat hier gebeur het, te beskryf nie.

“Ek het self ’n tweejarige kleinkind.

“Hoekom? ’n Mens soek na ’n rede. Daar was tot dusver nog geen veroordeling van die ANC nie. Wat as dit andersom (wit op swart) was? Die moord is beslis rasgemotiveerd.”

Mulder het ook gesê dat “die liedjies wat die ANC sing ’n klimaat (vir rassemisdaad) skep”.

“Besef hulle nie Woorde het betekenis?”

Willemien Potgieter (2) en haar ouers, Attie (40) en Wilna (36), is Woensdag op hul plaas vermoor.

Vyf van hul vermeende moordenaars het gister in die hof verskyn: mnre. Tshololo Tello Mischach Letala (18), Tapa Mopontola Mofokeng (23), Paulus Samson Vusimuzi Khumalo (22), Telleko Sex Seekoei (19) en Stemmer Boy Mofokeng (22).

Khumalo en die twee Mofo­kengs was plaaswerkers op Tweefontein.

Al vyf het gesê hulle gaan om borgtog aansoek doen.

Hulle sal weer Maandag in die hof verskyn.

Die sesde verdagte, ’n 17-jarige wat na bewering vir die teregstellingskoot op Willemientjie verantwoordelik was, gaan as minderjarige in ’n latere stadium verskyn.

Die vyf het op drie aanklagte van moord, een van gewapende roof met verswarende omstandighede en twee van die besit van ’n ongelisensieerde vuurwapen en ammunisie verskyn.

Buite die hof was die gemoedere gaande.

’n Vrou het ná die vermeende moordenaars se verskyning agter die polisievangwaens aangehardloop en geskree: “F*k julle, f*k julle...!”

Mnr. Steyn van Ronge, AWB-leier, nasionale lede van Afri­Forum-Jeug en plaaslike lede van die ANC-vroueliga was van die politieke figure wat teenwoordig was.

Vicus Bürger berig Vrystaat Landbou (VL) se visepresident, mnr. Dan Kriek, het gesê hy is daar in solidariteit met die gemeenskap en om simpatie met die Potgieters se familielede te betoon.

“Ons wou ook wys dat ons die regsproses ondersteun.”

Kriek het gesê hy was verheug om te sien hoeveel lede van die ANC-vroueliga by die hof was.

“Hulle verteenwoordig die ma’s van baie van ons kinders in Suid-Afrika.”

Volgens hom is dit belangrik dat mense wegbeweeg van die rassedebat.

“Misdade soos dié moet deur almal skerp veroordeel word. Dit maak nie saak wie die daad pleeg of teen wie dit gepleeg word nie.”


Vyf van die ses vermeende moordenaars van die Potgieters van Lindley is van links mnre. Tshololo Tello Mischach Letala (18), Tapa Mopontola Mofokeng (23), Paulus Samson Vusimuzi Khumalo (22), Telleko Sex Seekoei (19) en Stemmer Boy Mofokeng (22). Die sesde verdagte is minderjarig en het nog nie verskyn nie. (Foto: Jana van der Merwe)