‘Wit man, ek’t jou huis gevat’
2010-06-06 21:51
Inbrekers het op hul bed gesit, in haar negejarige dogter se bed geslaap en bier gedrink, gestort en selfs die goed in hul huis na hartelus rondgeskuif.
“Hulle was nie hier om te steel nie. Hulle het ingetrek,” het me. Loraine Steyn (37) gister gesê nadat haar lewensmaat Vrydagaand twee misdadigers in hul huis in Lynnwood, Pretoria, vasgetrek het.
“Die een het selfs vir Sven (Bergman) gesê: ‘Wit man, ek het jou huis gevat, jy moet uit’.”
Steyn het kort voor 17:00 by die huis gekom en gesien ’n oortreksel van ’n motorstoeltjie, wat veronderstel is om in ’n laai in die speelkamer te wees, lê in die oprit.
Die agterdeur was ook op ’n skrefie oop.
Sy het gery en om die draai van hul huis op Bergman gewag.
Hulle is saam na die huis, waarna Bergman om en deur die huis gestap het. Hy het niemand daarbinne gesien nie.
Die polisie het opgedaag, maar kort daarna weer gery.
Minder as ’n uur later het Bergman Steyn en haar twee dogters, Onica (9) en Kyla-Lee (5), afgesien omdat hulle die aand by haar ouers sou deurbring.
Terwyl hulle daarmee besig was, het hulle gesien hoe ’n man met Steyn se fiets oor sy skouer oor hul agterhek klim.
“Ek het vir hom geskree wie de donner dink hy is hy,” het Bergman gesê.
“Hy het my geïgnoreer asof ek nie bestaan nie.”
Die man het onderdeur die agterdeur, wat hy vroeër vermoedelik afgeskop het, geklim.
Bergman het voor om die huis gehardloop en hom gevang voordat hy by die trappe kon opstap. Toe sien Bergman die man dra sy tekkies.
Ondanks vrae oor wat hy doen, het hy aanhou loop.
Bergman het teruggehardloop na die agterhek, waar hy vroeër nog ’n man opgemerk het.
“Omdat ek geweet het die een is in my huis, het ek hom gelos en die ander een gaan haal,” het Bergman gesê.
“Ek het hom gevra wie hulle is en wat die ou in my huis soek.
“Die een met die fiets het toe met ’n stok uitgestap gekom en gesê hy gaan my huis vat.”
Bergman kon dit regkry om die twee in die huis te kry, terwyl Steyn die polisie gebel het.
Sowat tien minute later het die polisie daar opgedaag en die twee mans in hegtenis geneem.
Ná verdere ondersoek saam met die polisie het hulle agtergekom die mans het in hul beddens geslaap, bier gedrink terwyl hulle in Onica se bed gelê het, gestort, brood met botter geëet, goed in die huis rondgeskuif en vlae opgehang wat Bergman bymekaargemaak het.
Sers. Lynnette Erasmus, polisiewoordvoerder, het gesê die twee mans is onderskeidelik 23 en 27 jaar oud.
’n Saak van huisbraak word ondersoek.