Wittes in hofstryd oor poste in polisie

Poste in die polisie word eerder vakant gehou as om wit mans daarin aan te stel.

So nie word die poste eerder gevul met kandidate wat nie aan die minimum vereistes voldoen nie, het mnr. Dirk Groenewald, hoof van Solidariteit se arbeids­hof-­afdeling, gesê.

Solidariteit ondersteun tans drie sake in die arbeidshof van polisiemanne wat weens “streng geslags- en rassekwotas” nie bevorder word nie.

“In al drie die gevalle was hulle die mees verkose kandidate vir die poste. Dit is ouens wat die werk behoorlik sal kan doen, maar elke keer is iemand aangestel wat nie aan die vereistes voldoen nie,” het Groenewald gesê.

“Dienslewering word op die ou end ingeboet.”

Een van dié mense is ’n luitenant-kolonel wat sedert 1988 in die polisie is. Hy het aansoek om ’n kolonelsbestuurspos gedoen.

“Hy is later in kennis gestel dat die pos nie gevul is nie weens die gebrek aan verteenwoordiging van vroue,” het Groenewald gesê.

“Die polisie het aangedui dat hy wel die mees geskikte aanstelling sou wees vir die pos.”

Nóg ’n luitenant-kolonel, wat sedert 1982 in die polisie is, het 12 jaar lank in ’n pos waargeneem. Dié pos is opgegradeer na ’n hoër rang. Hy het twee keer om die pos aansoek gedoen en is albei kere as die beste kandidaat aangewys.

Tog is ’n ander kandidaat wat nie aan die minimum vereistes voldoen nie aangestel.

Kol. Vishnu Naidoo, nasionale polisiewoordvoerder, het gesê geslag speel ’n rol in die vul van poste omdat die wet dit vereis.
Naidoo het gesê 13 bestuursposte in die polisie is tans vakant, maar in almal neem iemand waar.

Groenewald is bewus van minstens 70 vakante poste waarin niemand waarneem nie.

Luidens die polisie se jaarverslag is slegs 32% van die polisie se lede tans vroue.

Van die polisie se totale mag is 60 945 vroue en 129 254 mans. Daar is net 14 602 wit polisiemanne.

Luidens ’n notule van ’n vergadering waar genl. Bheki Cele, nasionale polisiehoof, en verskeie adjunk-polisiehoofde verlede jaar Oktober teenwoordig was, moet minstens 45% lede van die polisie vroue wees.

Die drie sake wat Solidariteit nou hanteer, is nie onder die agt hangende sake teen die polisie nie wat verband hou met onbillike diskriminasie waar aanstellings en bevorderings streng op grond van ras plaasgevind het.

Een van dié sake is dié van kapt. Renate Barnard, wat ’n geding oor regstellende aksie teen die polisie gewen het, maar waarteen die polisie appelleer. 

Volg Beeld op Twitter. Klik hier.