Woede oor polisie drie skors

Honderde woedende lede van die polisie, nooddienste en weermag wat vir WB 2010 in die Laeveld ontplooi is, dreig om die strydbyl op te neem nadat drie polisiemanne verlede week summier sonder behoud van salaris geskors is.

Dié drie het onlangs saam met twee ambulansmanne ’n Fifa-amptenaar te hulp gesnel toe sy by haar huis in Nelspruit siek geword het.

Me. Beverly Salmon (38), ’n geleentheidskoördineerder van Fifa se plaaslike reëlingskomitee in Nelspruit, beweer ’n kamera is by haar huis in Opalstraat, West Acres, gesteel. In ’n verklaring aan die polisie beweer sy glo die polisiemanne was ook dronk.

Die vyf word nou deur klagte van diefstal in die gesig gestaar.

Salmon se vriend, glo ’n Duitser, het die nag van 5 Junie die polisiemanne langs die pad in Nelspruit voorgekeer en gevra hulle moet kom help, want Salmon “kry ’n hartaanval of iets”.

Beeld het betroubaar verneem die polisiemanne was in daardie stadium al van diens af, maar nog in uniform en het ’n groep Chileense toeriste by ’n restaurant opgepas.

Die toeriste is glo vroeër die aand gekry waar hulle in die onderdorp van Nelspruit by ’n ongure restaurant wou gaan kuier en die polisiemanne het hulle na ’n meer gegoede kuierplek vergesel.

Die polisie was omstreeks 23:00 op die punt om van die kuierplek te vertrek toe hulle genader is om Salmon te help. Hulle het na haar huis gejaag terwyl hulle solank ’n ambulans van Netcare ontbied het. By hul aankoms daar kon hulle nie toegang tot die perseel kry nie omdat die hekke gesluit was.

Hulle het dit probeer oopbreek. Intussen het Salmon, wat skynbaar verward voorgekom het, by die huis uitgekom en die hek vir hulle oopgesluit.

Die polisiemanne het haar na haar kamer gehelp. Kort daarna het die ambulansmanne opgedaag.

Salmon is gestabiliseer en na die Nelspruit Medi-Clinic gebring. Sy is opgeneem waar sy glo twee dae lank in die hoësorg-harteenheid behandel is.

’n Dag nadat sy ontslaan is, het sy glo ontdek haar kamera is weg en het sy toe die diefstalklag aanhangig gemaak.

’n Duidelik verbaasde Salmon het gister aan Beeld bevestig sy het die klag teen die polisie- en ambulansmanne aanhangig gemaak. “Ek hoop geregtigheid geskied,” het sy gesê.

Kapt. Leonard Hlathi, polisiewoordvoerder, het bevestig hulle ondersoek die diefstalklag. Hy het gesê niemand is nog in hegtenis geneem of aangekla nie.

Hy het bevestig die drie polisiemanne is geskors. “Hulle word departementeel vervolg op die bewerings dat hulle dronk was.”

Me. Robyn Baard, woordvoerder van Medi-Clinic, het gister bevestig Salmon is in dié hospitaal behandel, maar wou geen verdere inligting bekend maak nie.

Die Suid-Afrikaanse Polisie-unie (Sapu) het gister bevestig hulle gaan die polisiemanne in die departementele verhoor verdedig.

Daar is soveel ontevredenheid oor die voorval dat daar nou al selfs sprake van protesoptrede is.

Verskeie senior polisie-offisiere het gister hul misnoeë oor die voorval uitgespreek en gesê die polisiemag pas “dubbele standaarde” toe.

Hulle het verwys na strafregtelike klagte wat die afgelope week teen twee lede van die polisie se provinsiale bestuur aanhangig gemaak is.

Vrydag het kol. (adv.) Kevin James, waarnemende provinsiale hoof van regsdienste, in die hof verskyn op ’n klag van winkeldiefstal.

’n Klag van dronkbestuur is ook die naweek teen brig. Dan Morapeng, die provinsiale hoof van misdaadintelligensie in Mpumalanga, aanhangig gemaak.

“Hoekom word hulle nie ook summier geskors nie?”