Zim-mense in SA hoor hulle moet reg of hulle moet weg
2010-09-03 00:02
- Artikelopsies
- Deel
- Kry Beeld op
Media24-Afrika-kantoor
Zimbabwiërs in Suid-Afrika “word tussen die bene geskop” en “soos vuil doeke weggegooi”.
Dít was gister die reaksie van adv. Gabriel Shumba, hoof van die Zimbabwe Exiles’ Forum (ZEF) in Suid-Afrika, op ’n kabinetsbesluit dat onwettige immigrante, onder wie miljoene Zimbabwiërs, die land teen 31 Desember moet verlaat of die gevaar loop om uitgeskop te word.
Die kabinet het aangekondig die spesiale permitstelsel wat in April verlede jaar vir veral Zimbabwiërs ingevolge ’n ooreenkoms met die Zimbabwiese regering ingestel is, word afgeskaf.
Die twee regerings gaan ’n gesamentlike komitee aanstel wat oor die toepassing van die beleidsbesluit sal toesig hou, berig Philda Essop.
Onwettige immigrante het tot 31 Desember om hul dokumentasie met hul lande van oorsprong en die Suid-Afrikaanse departement van binnelandse
sake in orde te kry, het mnr. Themba Maseko, regeringswoordvoerder, gesê.
Diegene daarsonder sal ná 31 Desember gedeporteer word.
Naas die Zimbabwiërs is Mosambiekers die grootste groep.
Maseko het gesê dis “sodat ons kan begin om almal in dié land behoorlik te dokumenteer en sodat ons hul vingerafdrukke kan hê om te verseker dat wanneer iemand ’n misdaad pleeg, ons weet wie daardie persoon is”.
Shumba het aan Beeld gesê: “Dis absoluut skokkend. Die Suid-Afrikaanse regering lewer ons aan (pres. Robert) Mugabe uit. Dit is ’n skop tussen die bene vir elke Zimbabwiër wat sy vaardighede na Suid-Afrika gebring het en WB 2010 se stadions en paaie kom bou het.”
Volgens Shumba was die ZEF verlede week nog in gesprek met die departement van binnelandse sake.
“Daar was geen aanduiding daarvan dat dié stap op hande is nie. Ons het nog met hulle gepraat oor die 300 000 hangende asielaansoeke wat reeds by hulle ingedien is. Net 70 000 is tot dusver goedgekeur. Hul verskoning was dat daar ’n staatsdiensstaking is,” het Shumba gesê.
“Dis duidelik dat hulle ons wil terugstuur vir volgende jaar se verkiesing in Zimbabwe.
’n Volksmoord staar ons daar in die gesig.”