Bekende liedjies vars in musiekspel
2012-02-02 21:44
Smokey Joe’s Café
Cinema Nouveau
Al hoor jy net twee liedjies uit hierdie musiekspel, het jy al waarde vir jou geld gekry.
Die een is Deborah Lyons se vertolking van Pearl’s a Singer en die ander Victor Trent Cook s’n van I (Who Have Nothing).
Voeg dan daarby nog treffers soos Poinson Ivy, Jailhouse Rock, Spanish Harlem en Love Potion #9 en jy bons in jou stoel rond van pure plesier.
Musiekspele kry nou ook die kans om soos die operas en toneelstukke wat regstreeks van die verhoog na die grootskerm verplaas word, gehore te bereik wat hulle andersins nie sou kon sien nie.
Vir liefhebbers van musiekspele is dit goeie nuus dat hulle kan deel in dit wat op Broad-way aangebied word.
Smokey Joe’s Café het nie verniet 2?036 opvoerings beleef en ’n Grammy-toekenning ontvang nie.
Dit is ’n seldsame revue wat sonder dialoog en sonder ’n spesifieke tema net oor die genot van die vertolking van die 39 liedjies gaan.
Gaan kyk maar op YouTube en voeg jou aanwesigheid by die onder meer 37 255 ander wat reeds na Pearl’s a Singer gaan kyk het.
Die liedjies is van die duo Jerry Leiber en Mike Stoller, maar min mense verbind hulle twee met die treffers wat kunstenaars soos Elvis Presley, Tom Jones, Joe Cocker en Shirley Bassey hul eie gemaak het.
Selfs die lied wat Broadway self besing – On Broadway – het uit hul penne gekom.
Al ken ’n mens die meeste van die liedjies goed, word jy telkens verras met die vars manier waarop hulle aangebied word en die uitstekende manier waarop hulle verwerk is.
Ook die choreografie, kostuums en stel is indrukwekkend.
’n Mens sukkel aanvanklik met die ongenadige nabyskote op die sangers se gesigte, maar dit pla later nie meer nie.
Daar is ’n paar van hulle wat jou eintlik later betower terwyl hulle jou hele gesigveld vul.
Moenie begin twyfel as die vertoning stadig, amper gestroop, begin nie. Dit warm op tot brandpunt.
Met die oorspronklike rolverdeling van die musiekspel in die Shubert-teater in New York.
Nog Saterdag en Sondag.