Raakgelees

Karin Brynard se Plaasmoord is verlede jaar aan die Franse uitgewer Le Seuil verkoop. Die Nederlandse vertaling deur Riet de Jong-Goossens het vroeër vanjaar by Ailantus verskyn met die titel Moord op Huilwater en die Engelse vertaling van die plaaslike uitgawe van Murder on the Farm is pas voltooi.

Gerd Boeren skryf op die Nederlandse krimi-webblad Ezzulia: “Een vergelijking met grootmeester Henning Mankell dringt zich eveneens op. Stél dat Karin Brynard ervoor zou kiezen een reeks te schrijven rond politie-inspecteur Beeslaar, dan kunnen de literaire(!) thrillerliefhebbers zich binnenkort verheugen op een Zuid-Afrikaanse Wallander.”


’n Slaaptydstorieboek wat eers in Oktober sou verskyn het, is nou ’n topverkoper op amazon.com – danksy ’n elektroniese weergawe wat “uitgelek” en soos ’n veldbrand op die internet versprei het.

Go the f*ck to sleep onderbreek kinderrympies met vloekwoorde van ’n moedelose pa en is pragtig geïllustreer.

Dit is gemik op die uitgeputte ouer wat saans vergeefs wag vir sy kind om vaak te word, net om te voel hy gaan nooit uit daardie kamer kom nie, sê die skrywer Adam Mansbach. Fliekregte is opgeraap en die publikasiedatum is vervroeg na vandeesmaand.


Daar’s ’n nuwe gonswoord in letterkunde: die sogenaamde meta-memoires. Dis nou memoires binne memoires – volgens die uitgewers van Luca Spaghetti se memoires. Luca wie? Luca is die einste Italiaanse geliefde oor wie die joernalis Elizabeth Gilbert in Eat, Pray, Love skryf.

Un Amico Italiano: Eat, Pray, Love in Rome is Spaghetti se weergawe van hoe dit gevoel het om in Gilbert se memoires te verskyn. Dié boek is glo genadiglik lig en verteerbaar.

• ’n Onbekende Suid-Afrikaner is onder die vyf finaliste vir die Britse Crime Writers’ Association (CWA) se Debut Dagger-prys, wat onlangs in Bristol aangekondig is. Die Kaapse rolprent- en TV-draaiboekskrywer Michele Rowe het haar sielkundige riller, What Hidden Lies, geskryf toe sy verledle jaar wyle Stephen Watson se kreatiewe skryfkursus aan die Universiteit van Kaapstad bygewoon het. Haar studieleier was Mark Behr (Die reuk van appels). Sy het die eerste drie hoofstukke van die toe nog onvoltooide manuskrip aan die CWA-beoordelaars voorgelê. Die boek verskyn binnekort.