Om deur te breek na die subteks
2010-01-12 08:22
- Artikelopsies
- Deel
- Kry Beeld op
Anoeschka von Meck se boek,Vaselinetjie, kry eersdaags op die verhoog gestalte wanneer dit op die Suidoosterfees en die KKNK opgevoer word. Mariana Malan het by die repetisies vir die stuk gaan inloer.
V?aselinetjie is nie ’n tienerdrama nie, maar ’n drama met ’n rolverdeling wat hoofsaaklik uit tieners bestaan.
Die regisseur Henry Mylne (ook regisseur van 7de Laan) beklemtoon hierdie feit by herhaling. “Ek het die jong akteurs van die begin gewaarsku dat ek hulle soos professionele akteurs gaan hanteer. Ek het hulle gewaarsku dat ek ’n slawedrywer is en net met die beste tevrede sou wees.
“Hulle het entoesiasties gereageer, maar nie geweet waarvoor hulle hul inlaat nie.”
Mylne meen die jong spelers het vandeesweek eers “deurgebreek” en weet nou waarom alles gaan. Hulle het reeds op 10 Desember met die repetisies begin en oor Kersfees ’n kort ruskans gehad.
“Ten spyte daarvan dat sommige van hulle dit as ’n voorgeskrewe werk gehad het, het hulle glad nie die subteks verstaan nie. Ons moes saam die wêreld van geweld, seks, kru taal en werklik ernstige emosionele verwaarlosing oopbreek.”
Mylne vertel dat hy verstom was toe hy hoor hierdie boek is vir gr.11-skoliere voorgeskryf.
“Dis seker omdat ek uit ’n era van Trados – Die swerwer-Boesman kom dat ek nie kon glo wat die leerlinge van vandag as voorgeskrewe boeke het nie.”
Om ’n boek – hoe goed die verwerking ook is – op die verhoog weer te gee, is geen maklike taak nie, voeg hy by. “Die gehoor kry minder as twee uur tyd om die boek te absorbeer. ’n Leser het dae om dit te doen.
“Dis nie moontlik om die boek op ’n natuurlike manier aan te bied nie. Daar is byvoorbeeld 22 plekke waar tonele afspeel.
“Vaselinetjie word ouer.
“In ’n rolprent sou waarskynlik vier meisies die rol van een persoon gevul het. Verder het ons met ’n baie beperkte begroting gewerk.”
Hy het die probleme opgelos deur popkuns-animasie (deur Corné Venter) te gebruik.
“Suggestie word ingespan vir dinge wat op die verhoog gebeur.
“Hierdie Vaselinetjie (Andrea Streso) lyk nie soos daardie dogtertjie op die boek se voorblad nie; ’n illusie word geskep.
“Maar die gehoor gaan haar beslis aanvaar en ervaar.”
Die professionele akteurs in die stuk is Vinette Ebrahim en Theodore Jantjies (7 de Laan) en Kaz McFadden (Villa Rosa).
Die jong akteurs is Dustin Beck, William Constable, Chanelle Davids, Theunis Fick, Elandri Koegelenberg, Johan Marais, Danel Maree, Ilke Opperman, Dean Smith, Kay Smith, Ryan Steenkamp, Andrea Streso en Marli van der Merwe.
“Die trane het al geloop tydens repetisies,” vertel Mylne. “Dan sê ek maar net vir hulle niemand kan ’n akteur wees sonder dat jy ten minste een keer in trane uitgebars het nie.
“Dan sê ek ook vir hulle dat ek so moeg is dat ek nie meer kan loop nie, maar dat hulle my die eerste keer in twee jaar laat voel of ek werklik weer lewe.”
Mylne voeg by die boek “het vir my ’n wêreld oopgemaak”.
“Saam met Anoeschka (von Meck, die skrywer) het ons selfs ’n paar dele wat uit die boek gesny is na die verhoogstuk teruggebring. Ja, die inhoud mag skok, maar elke karakter op daardie verhoog bestaan werklik. Dis nie ’n sprokie nie. Die skokkende elemente word met humor, musiek en dans in jukstaposisie geplaas.”
Vaselinetjie word van Donderdag 28 tot Sondag 31 Januarie as deel van die Suidoosterfees in die Kunstekaap-teater opgevoer.