Oscar-benoemings gou of reeds in SA te sien
2012-02-01 22:46
- Artikelopsies
- Deel
- Kry Beeld op
Met die Oscar-benoemings wat pas aangekondig is, het Hollywood se dol skouerklop-seisoen nou sy kruin bereik.
Die nege rolprente in die wedloop – en waarvoor kykers kan uitkyk op die plaaslike kringloop – is so uiteenlopend soos kan kom en dek ’n tydvak wat strek van die 1920’s tot die terreuraanvalle van 11 September 2001.
War Horse van Steven Spielberg handel oor ’n jong man wat vrywillig in die Eerste Wêreldoorlog gaan veg om naby sy geliefde perd te wees. Dié fliek begin op 24 Februarie in Suid-Afrika draai.
The Tree of Life, van die visioenêre regisseur Terrence Malick, speel in verskillende tydvakke af en fokus op ’n man wat te midde van swaarkry, siekte en dood aanhou om liefde, vreugde en genade te vind. Dit is reeds in DVD-winkels beskikbaar.
Moneyball handel oor die bestuurder van ’n bofbalspan wat rekenaarstatistieke inspan om ’n wenspan saam te stel. Dit is eersdaags op DVD beskikbaar.
In Woody Allen se uitgelate Midnight in Paris beleef ’n skrywer dié romantiese stad in drie tydvakke. Die fliek draai nou landwyd in teaters.
Hugo van Martin Scorsese is ’n fantasie oor ’n weeskind wat ’n masjien ontdek wat aan die vader van die rolprentkuns, Georges Méliès, behoort het. Dié prent begin op 10 Februarie wys.
The Help speel in die Amerikaanse burgerregtebeweging van die 1960’s af en handel oor ’n werkgewer wat ’n boek vanuit haar huishulp se perspektief skryf. Dit is nog op die kringloop.
Extremely Loud & Incredibly Close toon ’n seuntjie se pogings om sy smart te verwerk nadat sy pa in die terreuraanvalle van 2001 sterf. Dié fliek begin op 2 Maart landwyd wys.
The Descendants handel oor ’n pa wat na sy dogters moet omsien nadat hul ma in ’n koma verval.
The Descendants is van môre af te sien in teaters.
The Artist is ’n stilprent oor ’n eens suksesvolle akteur van die stilprent-era en sy verbete pogings om by die era van die “praatfilm” aan te pas. The Artist is vir tien Oscars benoem.
Dié fliek begin op 5 April wys.
Die Oscars word op 26 Februarie in Los Angeles toegeken.