Vanaand se ‘Survivor’ ’n wipwaentjierit
2010-02-24 13:20
Sit maar die sitplekgordels aan, want vanaand se episode van Survivor SA: Santa Carolina (M-Net om 19:30) is ’n wipwaentjierit!
Dit is die een episode waarin die deelnemers so na aan vuisslaan en bloedvergieting kom as wat hulle onder die wakende oog van die aanbieder Nico Panagio kón kom.
Die gemoedere loop hoog en die kinkel in vanaand se episode – waar die twee stamme elk iemand van hul keuse by die ander stam kan gaan haal en daarmee saam iets van waarde by daardie stam kan wegneem – gaan jou laat lê van die lag.
Een van die stamme is beslis emosioneel en geestelik sterker as die ander en speel só kat en muis met hul teenstander se afgevaardigde dat dié baie na daaraan kom om heeltemal kop te verloor.
Die twee uitdagings is van die beste wat kykers tot nog toe in dié reeks gesien het.
Een van die deelnemers is daarop uit om iemand in die mededingende stam die josie in te maak en slaag uitstekend daarin.
En soms gebeur dinge só vinnig dat jy dit gaan mis as jy jou oë knip.
Die enigste vraag ná vanaand se episode is of M-Net die res van die reeks in dié trant sal kan volhou!