Voorste musici reeds reg vir 2e Wakkerstroom-fees
2011-11-27 21:09
- Artikelopsies
- Deel
- Kry Beeld op
Rona Sonnenberg, stigter en organiseerder van die Wakkerstroom-musiekfees, wat verlede jaar die eerste keer aangebied is, sê volgende jaar se tweede fees hou heelwat belofte in.
Die 2012-fees word die naweek van 3 en 4 Maart gehou.
Benewens instrumentale soliste, kamerensembles, orkeste en kore wat optree, is daar dié keer ook ’n opera-geselskap, Grandi Amici, wat uittreksels uit Franse operas aanbied.
Die Johannesburgse violis Zanta Hofmeyr is as spesiale gaskunstenaar genooi.
Die sangers wat in die onderskeie programme gaan optree, is die soprane Kelebongile Boikanyo van Opera Africa wat onlangs aangewys is as volgende jaar se jong kunstenaar vir musiek op die Nasionale Kunstefees in Grahamstad; die sopraan Michelle Corbin; die mezzo-sopraan Linette van der Merwe en die tenore Chris Mostert en Gareth Witten.
Pianiste wat reeds uitnodigings na die fees aanvaar het, is Peter Cartwright, Jannie le Roux, Malcolm Nay en Olga Tsihelashvili.
Diane Coutts neem as sowel pianis as orrelis deel.
Die Polina Burdukova-trio van Johannesburg is ook op die program.
Helen Vosloo, een van die land se voorste fluitspelers, derde lid van die Hemanay-trio saam met Malcolm Nay en Marian Lewin en ook stigter-direkteur van die Keiskamma-musiekakademie, naby Hamburg in die Oos-Kaap, het ook ’n uitnodiging aanvaar.
Daar is ook ’n groep jong musici wat in Wakkerstroom hul opwagting maak: die klarinetspeler Luke Newby (20); die violiste Neo Motsatse (11) en Jonathan Mayer (16); die violis-pianis Jemma Zoe Thorburn (18); en die pianis Iman Bulbulia (8).
Die Mpumalanga Jeugkoor, die Pretoria Boys High School Dixie Band en ’n gospel-groep is ook ingesluit en Russell Stirling se klassieke- kitaar-kwartet tree saam met die Wakkerstroom-danser Marynaz de Bruin op.
Die Saterdagmiddag kry ’n Glyndebourne-kleur met ’n piekniek op die grasperk voor die NG kerk.
Die sopraan Mimi Coertse en die dirigent Weiss Doubell is die gashere by die galakonsert wat die Sondag gehou word.
“As ek net één persoon kan oorhaal om na goeie musiek te luister, sou ek al my doel bereik het,” sê Sonnenberg.
“Die uiteindelike doel van die fees is om op lang termyn genoeg geld in te samel vir ’n beurs vir ’n talentvolle jong musikus om studies hier of in die buiteland voort te sit.”
Besprekings vir die musiekfees in Wakkerstroom, net drie uur se ry van Johannesburg, begin Donderdag en kan gedoen word by die algemene-navrae-nommer 017 730 0778.