Wen met jou drama in RSG-wedstryd
2010-03-02 10:44
- Artikelopsies
- Deel
- Kry Beeld op
Doop jou veer in ink, want die radiostasie RSG en Sanlam se radiodramaskryfkompetisie vir 2010 is pas aangekondig.
Margot Luyt van RSG sê enigeen met bewese skryftalent kan vir die kompetisie inskryf, ongeag of hulle al voorheen ’n radiodrama aangepak het of nie.
Deelnemers moet net seker maak hulle hou by die voorgeskrewe riglyne.
Oor verlede jaar se inskryf-oes sê Luyt dit was lekker om te sien dat mense respek vir die radiodrama as genre begin ontwikkel.
Die voorskrifte waaraan voldoen moet word, word verskaf in ’n handleiding wat saam met die reëls vir die kompetisie beskikbaar is by http://www.rsg.co.za/aflaai_dokumente.asp of http://www.sanlam.co.za/afr/kompetisies/radiodrama/algemene+inligting.htm.
Verlede jaar se pryswenner, Piet Steyn van Vrede in die Vrystaat, het onlangs sy wentjek van R20 000 in ontvangs geneem vir sy drama Die mynramp.
Leon van Nierop van Randburg was tweede met Twyfelberg. Hy het met prysgeld van R10 000 weggestap.
Stephanie Botes van Middelburg in Mpumalanga was derde met As die poelpetaan roep en het daarmee R7 000 losgeslaan.
Dit is Botes se eerste poging tot ’n radiodrama, vertel Luyt. Die sluitingsdatum vir inskrywings vir RSG en Sanlam se radiodramaskryfkompetisie is Woensdag 30 Junie.
Die handleiding kan ook by margaret@rsg.co.za of margot@rsg.co.za, asook by 021 430 8166/8204 of 011 714 2018 bestel word.
Van die tekste kan teen vergoeding opgevoer en uitgesaai word.