100-jarige whisky gaan gered word
2009-11-17 22:40
- Artikelopsies
- Deel
- Kry Beeld op
Wellington (Nieu-Seeland). - ’n Span gaan deur die Antarktiese ys boor om ’n verlore besending Skotse whisky wat al ’n eeu daar lê op te spoor.
Die span boorders gaan twee kratte McKinlay & Co.-whisky probeer opspoor wat sir Ernest Shackleton in 1909 as deel van sy mislukte Suidpool-sending na Antarktika verskeep het.
Whyte & Mackay, die drankmaatskappy wat nou McKinlay & Co. besit, het ’n monster van dié whisky gevra sodat toetse gedoen kan word om te bepaal of dié bepaalde handelsmerk whisky (waarvan produksie nie meer plaasvind nie) weer gemaak moet word.
Die kratte is vasgevries onder die Nimrod-ekspedisiehut naby Kaap Royds.
Mnr. Al Fastier, programbestuurder by die erfenistrust en leier van die voorgenome ekspedisie in Januarie, het gesê restourasiewerkers het in 2006 op die kratte whisky afgekom onder die hut se vloerplanke. Tóé was die kratte te diep in die ys vas.
Die Nieu-Seelanders sal nie al die bottels whisky kan uithaal nie: Ingevolge bewaringsriglyne waarop die 12 nasies in die Antarktiese ooreenkoms ooreengekom het, moet die meeste daar bly.
Fastier het gesê hy wil nie die inhoud proe nie. “Dit is beter om mens dit te verbeel as om dit werklik te proe. Só behou dit die misterie wat daaraan gekoppel geraak het.”