Aarde tril toe baba lewenslig aanskou
2010-09-07 22:07
’n Jong Suid-Afrikaanse egpaar wat in Christchurch, Nieu-Seeland, woon, het ’n skrikwekkende ervaring gehad toe hul baba gebore is op presies dieselfde tyd dat die kragtige aardbewing en kort daarna die eerste naskok Christchurch Saterdag om 04:35 getref het.
Klein Dianthe-Rose Barnard het haar verskyning om 04:41 ná ’n lang aanloop gemaak.
Maar die mees dramatiese oomblikke was in die laaste tien minute voor en tydens haar geboorte.
Pa Evert Barnard (24) het vertel hy en die verpleegpersoneel moes die kraambed tydens dié angswekkende oomblikke vashou.
“Alles het rondgespring, die ligte het aan- en afgegaan en al die water het uit die geboortebad gespat, tot teen die dak.
“En ek het sommer begin huil.”
Sy vrou, Maruschkè (20), het gesê sy kan niks van die verskriklike ervaring onthou nie, maar die skok tref haar nou eers soos elke naskok wat die stad kort-kort ruk.
Ook by die geboorte was Dianthe-Rose se ouma en oumagrootjie, mevv. Hannelie Viljoen en Dot Smit.
Dianthe-Rose se oupa, mnr. Joseph Viljoen, wat buite in die wagkamer gedut het, het tydens die aardbewing van die bank geval en oor die vloer gerol.
Niemand is ernstig beseer nie.
Mnr. Barnard het gesê hulle sou aanvanklik na die Burwood-hospitaal gaan, maar is uiteindelik in Christchurch se Women’s Hospital opgeneem omdat Dianthe-Rose meer as ’n week laat was.
Die Burwood-hospitaal het sleg deurgeloop in die aardbewing en Barnard het gesê hy is dankbaar die bevalling het goed afgeloop.
Die Barnards woon die afgelope vier jaar in Nieu-Seeland.
Hulle het vroeër in Sasolburg gewoon.
Die wrak van ’n motor wat in die aardbewing beskadig is. Foto: Iain Mcgregor, Reuters