Borgskap kwyt oor Bok-twiet
2010-09-07 22:07
’n Australiese Olimpiese swemkampioen is ’n borgskap kwyt nadat sy die Springbokke op Twitter sleggesê het.
Stephanie Rice, wat drie goue medaljes by die Olimpiese Spele in Beijing gewen het, het ’n kontrak met die motorvervaardiger Jaguar verloor ná haar homofobiese uitlating op Twitter.
Die 22-jarige Rice het die aanmerking “Suck on that faggots!” gemaak ná Australië se sege oor Suid-Afrika in die Drienasies-rugbywedstryd in Bloemfontein Saterdag.
Rice, wat glo ’n verhouding met die Australiese losskakel Quade Cooper het, het later die inskrywing uitgevee en om verskoning gevra.
Volgens haar het sy nie bedoel om aanstoot te gee nie.
“Ons het ons ooreenkoms met haar beëindig,” het mnr. Mark Eedle, Jaguar-woordvoerder, aan die Australian Associated Press gesê.
Volgens Eedle wil Jaguar nie met die uitlating geassosieer word nie.
Rice is die tweede bekende atleet in ’n paar dae wat oor aanmerkings op Twitter in die moeilikheid is.
Die Engelse krieketspeler Kevin Pietersen is eergister beboet omdat hy op die mikro-blog-webwerf gevloek het.
Die Engelse en Walliese Krieketraad het gesê die aanmerkings is ’n verbreking van sy indiensnemingsvoorwaardes, maar het nie besonderhede oor die boete bekend gemaak nie.
Pietersen het reeds die inhoud van sy boodskap, wat met sy weglating uit die Engelse se eendagspan vir die reeks teen Pakistan verband hou, uitgevee en daarvoor om verskoning gevra.