Dié gebied stier gevegte in hul peetjie
2010-07-28 23:52
Sapa-AFP en Elise Tempelhoff
Stiergevegte is gister in Katalonië, die noordoostelike deel van Spanje, verbied.
Katalonië se parlement van 135 lede in Barcelona het ten gunste van so ’n verbod gestem.
Plaaslike en internasionale diereregtegroepe het veldtogte van stapel gestuur om die parlement daartoe te oorreed.
Me. Christene Kuch van die Nasionale Dierebeskermingsvereniging in Suid-Afrika het Katalonië se besluit verwelkom en gesê bulgevegte is ’n vorm van dieremishandeling.
Sy het daarop gewys dat dit nie ’n onlosmaaklike deel van die Spaanse kultuur is nie.
Spanje se Kanariese Eilande het bulgevegte reeds in 1991 verbied as deel van hul algemene dierebeskermingswetgewing.
Kuch het die hoop uitgespreek dat Katalonië se besluit ’n gesprek oor die praktyk in die res van die land sal laat posvat en dat bulgevegte dan in die hele Spanje verbied sal word.
Diereregteaktiviste in Katalonië het met die slagspreuk “Prou” (“genoeg” in Spaans) petisieveldtogte van stapel laat loop en sowat 180 000 handtekeninge gekry van mense wat teen bulgevegte gekant is.
Dié aktiviste in Katalonië is ondersteun deur die Wêreldvereniging vir die Beskerming van Diere wat 140?000 handtekeninge van regoor die wêreld gekry het.