Duisende geheime militêre lêers lek uit
2010-07-27 23:12
Washington. - Die uitlek van meer as 90 000 geheime militêre lêers het ontsteltenis veroorsaak onder die lande wat deel is van die oorlog in Afganistan.
Die Amerikaanse departement van verdediging probeer naarstig die bron van die inligting opspoor.
Hulle probeer bepaal of die inligting die gewapende magte of operasionele veiligheid of die nasionale veiligheid van die land op die spel kan plaas, het mnr. Geoff Morrell, Pentagon-woordvoerder, gesê.
Sowat 92 000 dokumente gedateer 2004 tot 2009 is beskikbaar gestel aan The New York Times, die Britse Guardian en Duitsland se Der Spiegel deur die WikiLeaks-webwerf, wat dit ook Sondag geplaas het.
Van die opspraakwekkendste bewerings is dat Pakistan, ’n kernbondgenoot van die VSA in dié oorloggeteisterde gebied, toelaat dat hul spioene direk kontak maak met die Taliban.
Volgens die Times ontmoet Pakistanse agente en Taliban-verteenwoordigers gereeld om militante groepe te koördineer wat teen Amerikaanse soldate in Afganistan veg, asook om sluipmoorde op Afgaanse leiers te beplan.
Die lêers bevat ook inligting dat die dood van onskuldige burgerlikes onder die mat gevee is en dat Iran geld verskaf aan Taliban-militante agt jaar ná die inval in 2001 gelei deur die VSA wat die radikale Islamitiese leierskorps uit die kussings gelig het.
Mnr. Robert Gibbs, woordvoerder van die Withuis, het die uitlek van inligting veroordeel en gewaarsku dat die name van dienspersoneel en militêre operasies nou in die openbare domein is, maar het tog die impak daarvan onderspeel.
Hy het daarop gewys dat die lêers inligting bevat wat kom uit die Bush-administrasie en geen groot onthullings bevat nie.
’n Woordvoerder van die Duitse departement van verdediging het gesê die uitlek van die dokumente kan ’n impak hê op die nasionale veiligheid van Navo-bondgenote, asook die hele Navo-operasie.
Brittanje het gesê hulle betreur die voorval en volgens Pakistan weerspieël die dokumente nie die werklikheid nie.
WikiLeaks het nie die identiteit van hul informant bekend gemaak nie.
Sommige ontleders wys egter die vinger na ’n Amerikaanse soldaat, Bradley Manning, wat in Irak in hegtenis geneem en aangekla is nadat hy glo ge-klassifiseerde inligting aan die webwerf gelek het.
Die Pentagon het verlede maand bewerings ondersoek dat Manning ’n geklassifiseerde video van ’n aanval in Bagdad en 260 000 geheime diplomatiese dokumente aan WikiLeaks gelek het.