Elin gaan van Tiger skei, berig tydskrif
2009-12-17 13:04
- Artikelopsies
- Deel
- Kry Beeld op
Los Angeles. – Elin Nordegren (29) is van plan om van Tiger Woods te skei, berig die skindertydskrif People.
Dit kom nadat sy sonder haar trouring in die openbaar gesien is en nadat ’n meubelwa by hul huis in die Amerikaanse deelstaat Florida gewaar is.
Die tydskrif het gister ’n vertroueling van Nordegren as bron aangehaal in ’n berig dat sy van plan is om van die gholf-superster te skei. Hy het glo verhoudings met tot 14 ander vroue gehad.
Die bron het gesê Nordegren, ’n gewese kinderoppasser en model, het “haar besluit geneem”.
“Daar is niks om oor te dink nie. Hy sal nooit verander nie.”
Die webwerf RadarOnline beweer Nordegren het die dienste bekom van die prokureur wat die egskeidingsgedinge van sterre soos Nicole Kidman, Nicolas Cage en Britney Spears behartig het.
Intussen is Woods gister in ’n peiling onder Amerikaanse sportredakteurs aangewys as sportman van die dekade.
Die fietsryer Lance Armstrong was tweede en die tennisster Roger Federer derde.