Jig, die allergie is toe ’n baba!
2010-03-09 22:46
- Artikelopsies
- Deel
- Kry Beeld op
Een aand tienuur het ’n Britse vrou (21) vir die eerste keer gehoor sy is swanger. Sowat 4½ uur later is die baba gebore.
Die Britse koerant The Daily Telegraph berig me. Belinda Waite van die dorp Bampton in Devon het nege maande lank
eienaardige simptome gehad.
Sy het die plaaslike hospitaal verskeie kere besoek, maar van die dokter gehoor sy ly aan ’n ernstige geval van prikkelbare dermsindroom.
Sy was inderwaarheid swanger, maar die dokter kon dit nie raaksien nie.
Toe haar hande en voete opswel, is sy weer hospitaal toe, waar die dokter jig of ’n allergie gediagnoseer het.
“Jy lees in tydskrifte van sulke gevalle, maar jy dink nooit dit kan met regte mense gebeur nie en ek het beslis nie gedink dit kan met my gebeur nie,” het sy aan die koerant gesê.
Waite was op 6 Februarie tuis saam met haar lewensmaat, mnr. Wayne Boyles (28), toe sy meteens kraampyne gekry het, maar nie geweet het wat dit is nie. ’n Bekommerde Boyles het met haar hospitaal toe gejaag.
Die aand tienuur het ’n dokter gesê sy gaan enige oomblik ’n baba in die wêreld bering. Halfdrie die oggend is Louise, ’n gesonde meisietjie, gebore.