Khmer Rouge-hoë kry 25 j. vir moord
2010-07-26 22:55
- Artikelopsies
- Deel
- Kry Beeld op
Phnom Penh (Kambodja). - Die eerste Khmer Rouge-bevelvoerder wat voor ’n Verenigde Nasies (VN)-gesteunde tribunaal verskyn het, is gister tot 25 jaar tronkstraf gevonnis weens sy toesighouding oor 14 000 sterftes in die 1970’s.
Kaing Goe-ek Eaf (67), ’n voormalige tronkhoof wat as Duch bekend gestaan het, sal egter, tot die woede van talle Kambodjane, net sowat die helfte van dié vonnis uitdien.
Die aanklaers het om die maksimum vonnis van 40 jaar gepleit weens Duch se aandeel in die “Killing Fields”-regime, wat geblameer word vir 1,7 miljoen sterftes tussen 1975 en 1979.
Duch is onder meer skuldig bevind aan moord, marteling, verkragting, misdade teen die mensdom as hoof van die Toeol Sleng-tronk, ’n omgeskepte skool wat as S-21 bekend gestaan het.
S-21 was ’n simbool van die wreedhede van ’n regime wat bykans ’n kwart van Kambodja se bevolking uitgewis het.
Duch was emosieloos toe die regter sy beslissing, wat sy tronkstraf sny tot 19 jaar omdat hy reeds tyd in die tronk deurgebring het, uitlees.
Hy kan volgens die hof nog vroeër op parool vrygelaat word as owerhede reken hy is gerehabiliteer.
“Ons het gehoop hierdie tribunaal sou sterk teen straffeloosheid optree, maar as mens 14 000 mense kan vermoor en net 19 jaar tronkstraf uitdien - 11 uur vir elke moord - is dit ’n grap.
Ek voel dit aan my broek se naat dat dié vonnis dit vir Kambodja erger gemaak het. Dit het mense vertroue in die stelsel laat verloor en daar is nou kommer oor politieke inmenging,” het me. Theary Seng, wie se pa in S-21 vermoor is, gesê.
Hy het geen keuse gehad nie as om die opdragte uit te voer en om “te vermoor of hy word vermoor”, het Duch getuig.
Aanklaers het egter volgehou hy het nes top- Khmer Rouge-bevelvoerders gedink en niks gedoen om die erge marteling in sy tronk stop te sit nie.
Talle Kambodjane het gehuil toe hulle die vonnis hoor en het hul woede uitgespreek teenoor die VN-Kambodjaanse hof, wat vir vyf jaar sowat $78,4 miljoen (sowat R518 miljoen) se buitelandse skenkings gebruik het in dié verhoor.
Mnr. Tsjoem Mei (79), ’n oorlewende van S-21 Toeol Sleng-tronk, hou ’n koerant met ’n foto van Kaing Goe-ek Eaf omhoog. Foto: Chor Sokunthea, Reuters
Toeriste kyk na skedels van meer as 8 000 van slagoffers van die Khmer Rouge-regime in Tsjoeung Ek, aan die buitewyke van Phnom Penh. Foto: Reuters