Met baie rukke en skote uit Maputo
2010-09-03 00:06
Twee Johannesburgers kon gister maar net toekyk hoe ’n Mosambiekse polisieman voor in hul voertuig sit en hulle al skietende met sy AK47 uit die chaotiese, onlusgeteisterde Maputo lei.
In nog ’n voorval is die bakkie van mnr. Bertus Gründling, ’n verkoelingstegnikus van Nelspruit, deur ’n betoger se klip so groot soos ’n baksteen getref terwyl hy en sy twee seuns van Matola na die Lebombo-grenspos na Suid-Afrika gery het.
Albei groepe was sedert eergister in Mosambiek vasgekeer toe onluste oor stygende kospryse oor Maputo en Matola heen uitgebreek het.
“Ons moes Dinsdagaand in ’n supermark in Maputo op planke slaap toe ons weens die geweld in die stad vasgekeer was en nie by die gastehuis in Matola kon uitkom nie?.?.?. dwarsdeur die nag kon ons skote hoor,” het Gründling gesê.
Die oproer in die hoofstad het gister taamlik bedaar, maar sporadiese voorvalle van geweld en plundery is steeds aangemeld, het die Mosambiekse owerheid gesê.
Mnre. Mark Hankey (49) en Alan Metcalfe, sy vennoot, van Johannesburg het gistermiddag bewerig, maar ongedeerd die grenspos na Suid-Afrika oorgesteek.
Hankey se eerste besoek aan Maputo was ’n vreemde belewenis.
Die twee dryf handel in beskermende klere en het Dinsdag in Maputo aangekom vir ’n vergadering met klante.
“Dinsdag was daar geen teken van onrus nie. Toe ons die volgende oggend in die Maputo Sun se voorportaal kom, het die mense oral rondgemaal. Die hotelpersoneel het gesê daar is groot moeilikheid weens betogings in die stad en dat dit te gevaarlik is om die hotel te verlaat. Ons moes heeldag langs die swembad sit.”
Gisteroggend het die twee vennote die hasepad gekies terug Suid-Afrika toe.
“Ons was kwalik ’n kilometer of twee van die hotel af toe ons die eerste versperring bereik het. So 4 km verder was die pad heeltemal toe met brandende versperrings.
“Die polisie het op die betogers geskiet en ons het agter ’n polisievoertuig aangery aangesien ons teen daardie tyd al ’n bietjie verdwaald was.”
’n Ent verder het hulle by die polisievoertuig stilgehou en die polisiemanne gevra om hulle uit die stad te help kom. ’n Polisieman het met sy geweer voor in Hankey se voertuig geklim, terwyl ’n polisievoertuig hulle begelei het.
“Ons het deur verskeie versperrings gejaag met die polisieman wat by die venster uit skote in alle rigtings geskiet het om die betogers af te skrik. Buite die stad het die polisie afgetrek en gesê dit sal veilig wees om alleen verder te ry.
“Ons het voet in die hoek gesit en gejaag vir al wat ons werd was,” het Hankey gesê.
Sowat 131 van die 230 mense wat eergister op SAL-vlugte na Suid-Afrika wou terugkeer, het gister op die 13:00-SAL-vlug van Maputo op die O.R. Tambo-lughawe geland.
Mnr. Stuart McDonald het by sy aankoms gesê die rit na Maputo se lughawe het hom herinner aan Suid-Afrika in die 1980’s: “Brandende bande en skote wat vlieg.”
– Cobus Coetzee, Erika Gibson, Gloria Edwards en Sapa-AFP
’n Polisieman probeer orde handhaaf in Maputo terwyl betogers op die agtergrond rommel aan die brand steek.
Foto: Grant Lee Neuenburg, REUTERS