Minister voor stok oor gay reismaat

Mag ’n minister sy lewensmaat op ’n ampsbesoek saamneem?

In Duitsland is die antwoord sonder meer ja, mits die lewensmaat sy of haar eie koste dra – en mits die verbintenis ’n heteroseksueel is.

Mnr. Guido Westerwelle, die gay Duitse minister van buitelandse sake, word tans deur die parlementêre opposisie voor stok gekry omdat hy mnr. Michael Mronz, sy lewensmaat, op ’n ampsbesoek aan Argentinië en Chili saamneem.

Die opposisie gaan vra of Mronz, ’n sport-sakeman, enige ekonomiese voordeel uit die besoek trek.

Sulke vrae is nog nooit tevore gestel wanneer ministers hul (heteroseksuele) maats saamneem nie.

Die ironie is dat die opposisie, die Sosiaal-Demokratiese Party (SPD), relatief linksgesind is.

En die minister is leier van die Vrye Demokratiese Party (FDP), wat taamlik regsgesind is.

Bowendien het Westerwelle die laaste weke tot die irritasie van dr. Angela Merkel, Christen-Demokratiese bondskanselier, selfs as regs-populisties ontpop.

’n Woordvoerder van die departement van buitelandse sake het geantwoord dat Mronz se ekonomiese belange niks met die reis te doen het nie.

In Buenos Aires gaan hy byvoorbeeld tehuise vir arm kinders besoek, dieselfde soort program wat meestal vir ministersvroue gereël word.

Vrae word ook gevra oor die samestelling van die handelsafvaardiging wat die minister vergesel.

Volgens die SPD is verskeie sakelui wat groot bedrae aan die FDP geskenk het, deel van die afvaardiging.