Motor opgeblaas: Man is g’n terroris – net haastig

Londen. – Die polisie het ’n motor wat te na aan die Britse premierswoning geparkeer was, opgeblaas uit vrees dat dit gebruik kon word in ’n terreuraanval.

Toe mnr. Michael Raphel (28), die motor se niksvermoedende baas, later terugkeer, het hy op ’n uitgebrande wrak afgekom.

Dis al wat oorgebly het van sy Honda Civic Type R, wat sowat £18000 (byna R224000) gekos het.

Volgens die Daily Telegraph het Raphel die motor voorverlede Saterdag om 10:00 sowat 400m van 10 Downing Street onwettig op ’n dubbele geel streep geparkeer. Hy is van Oxford en het ’n vriend besoek, maar was haastig.

Toe die polisie hom van die motor sien weghardloop, het hulle dadelik gedink dit is ’n terreurpoging. Twee beheerde ontploffings is uitgevoer wat die motordeure laat afskiet en sy ruite gebreek het.

Toe Raphel sowat 16 uur later terugkeer, was die wrak omring deur teen-terreurbeamptes.

Hoewel Raphel “begrip” het vir terreurvrese, meen hy die polisie kon meer “taktvol” gewees het. “Die motor is in my naam geregistreer en hulle kon gerus probeer het om my eers te kontak.”

Hy beoog om vergoeding van die polisie te eis. ’n Versekerings­kenner meen egter omdat hy onwettig geparkeer het, is dit onwaarskynlik dat hy uitbetaal gaan word.

- Beeld