Polisie waarsku voor fees waar 19 doodgaan
2010-07-26 22:55
Duisburg (Duitsland). – ’n Polisievakbond se waarskuwings oor die gevare wat dit sou inhou om die Liefdesparade-musiekfees in dié dorp te hou, is geïgnoreer, het die hoof van die vakbond gister gesê.
Negentien mense, onder wie ses buitelanders, is Saterdag dood toe ’n samedromming tot ’n vertrapping en versmoring van feesgangers gelei het. 342 mense is beseer.
Baie Duitsers kan dit glad nie kleinkry dat só ’n tragedie in hul hoogs georganiseerde land kon plaasvind nie.
Dr. Angela Merkel, kanselier, het gesê sy verwag dat die ondersoek na die gebeure “pynlik noukeurig” sal wees.
Mnr. Rainer Wendt, hoof van die polisievakbond, het gesê hy het ’n jaar gelede gewaarsku dat Duisburg te klein en beknop is vir die “liefdesfees”.
Mnr. Adolf Sauerland, burgemeester, wat Sondag op die toneel van die tragedie teen woedende omstanders beskerm moes word, het gesê sy stadsraad verleen sy volle samewerking aan die vervolgingsowerheid.
“Ons sal antwoorde hieroor kan gee sodra ons die antwoorde aan die staatsowerhede verskaf het,” het Sauerland gesê.
“Ons het alles gedoen om dit veilig te maak.”
Noodhulpwerkers help feesgangers wat in die stormloop beseer is. Foto: Kirsten Neumann, Reuters