Prostituut toe al die tyd ’n doktor

Londen. – ’n Voormalige prostituut wie se anonieme blog-inskrywings Brittanje jare lank laat raai het oor wie sy is, is ontmasker as ’n wetenskaplike met ’n doktorsgraad.

“Belle du Jour” se avonture as ’n hoëklas-sekswerker waaroor sy sedert 2003 geblog het, het gelei tot die TV-reeks Secret Diary of a Call Girl, met die aktrise Billy Piper in die hoofrol.

In ’n opspraakwekkende onderhoud met die Sunday Times het sy die afgelope naweek uiteindelik haar identiteit bekend gemaak as dr. Brooke Magnanti (34), ’n blonde navorser aan die Universiteit van Bristol.

Sy het 14 maande lank teen £300 (sowat R3?700) per uur vir ’n gesellin-agentskap gewerk terwyl sy haar tesis voltooi het.

Gister het dit bekend geword sy het besluit om self na vore te kom nadat die Daily Mail ’n ondersoek gedoen het met die doel om haar vandeesweek te ontmasker.

Magnanti het ook in 2005 ’n topverkoper-boek, The Intimate Adventures of a London Call Girl, gepubliseer en beplan nou ’n opvolg.

Haar blog-inskrywing begin met die redes vir haar besluit om die seksbedryf te betree, naamlik dat sy nie langer haar huurgeld as student kon betaal nie.
 
“Ek het myself gevra wat ek onmiddellik kan doen om kontant te kry wat nie veel opleiding verg nie en genoeg tyd laat om my studie te voltooi.”

Kerklui en vrouegroepe het Magnanti intussen gekritiseer oor die feit dat sy sekswerk “glansryk” laat lyk.