Romney kry hupstoot
2012-02-01 10:39
- Artikelopsies
- Deel
- Kry Beeld op
TAMPA. - Mnr. Mitt Romney het die Republikeinse Party se voorverkiesing in die Amerikaanse staat Florida gewen en sodoende 'n groot hupstoot gekry in sy poging om as dié party se kandidaat aangewys te word om pres. Barack Obama in die presidentsverkiesing later vanjaar teen te staan.
Met dié sege het oudgoew. Romney van die momentum herwin wat hy prysgegee het toe mnr. Newt Gingrich die voorverkiesing in Suid-Carolina op 21 Januarie gewen het.
Met die uitslae in sowat die helfte van die kiesafdelings in Florida beskikbaar, het Romney 47% van die stemme op hom verenig en Gingrich 31%.
Dié oorwinning verseker Romney van die steun van al 50 Florida se afgevaardigdes op die party se nasionale konvensie in Augustus.
Ten einde amptelik as die party se presidentskandidaat aangewys te word, moet 'n kandidaat 1 144 afgevaardigdes se stemme op hom verenig.
Gingrich, 'n voormalige speaker in die huis van verteenwoordigers, het onderneem om tot met die party-konvensie aan te hou veg. - Sapa-AP