Storm oor ‘spook’ van Diana
2011-06-30 00:50
Los Angeles. – Hoe grillerig is die spook van Diana, prinses van Wallis?
So vra The Atlantic Wire in reaksie op die nuustydskrif Newsweek se jongste voorblad waarop ’n digitaal gemanipuleerde Diana saam met Catherine, die hertogin van Cambridge, verskyn.
Die voorblad is deur lesers en die media met skok en afgryse begroet.
Op die foto is Diana nog skraal en elegant, maar sy het ’n paar plooie.
“Skokkend, briljant of net doodgewoon goedkoop?” was The New York Times se kommentaar.
Newsweek bespiegel in ’n bygaande artikel hoe Diana sou gelyk het indien sy nie 14 jaar gelede verongeluk het nie.
By die artikel word nóg ’n foto van Diana met ’n iPhone in die hand geplaas.
Die eksemplaar het vandeesweek op winkelrakke verskyn – in dieselfde week as wat Diana se seun, prins William en sy vrou, Catherine, hul amptelike besoek aan Noord-Amerika begin.
Tina Brown, hoofredakteur van Newsweek, bespiegel in die artikel oor hoe Diana reeds weer twee keer sou getrou, al Botox gebruik en effens jaloers gewees het op haar nuwe skoondogter.
Die nuusmedia-blog Medianite.com verwys na die voorblad en artikel as “disrespekvol op soveel vlakke”.
Volgens Brown, wat ook in 2007 ’n soetsappige biografie oor Diana geskryf het, sou Diana nou in New York gewoon en goeie vriende met prins Charles en sy tweede vrou, Camilla, gewees het. Sy en Camilla sou selfs Facebook-vriende gewees het. Diana sou van rolprente soos The Kings’ Speech en die TV-reeks The Real Housewives of New York gehou het. Op Twitter sou Diana 10 miljoen volgelinge gehad het. David en Victoria Beckham sou van haar vriende gewees het.
Die mees omstrede deel van die artikel is waar Brown suggereer Diana sou jaloers op Catherine gewees het. Diana sou “gewoond daaraan moes raak” om die kollig met Catherine te deel, skryf Brown.
Brown bespiegel ook dat Diana haar sou uitgespreek het teen die koninklike snobisme waarmee daar glo op Catherine se nie-aristokratiese opvoeding neergesien word. Sy en Catherine se ma, Carole, sou glo ook beste vriendinne gewees het.
Van die kommentaar op Newsweek se webwerf het die volgende ingesluit: “Oe, dit is so sonder smaak ... Laat die arme vrou in vrede rus ... As ek een van haar familielede was, sou ek ontsteld gewees het.”
Ander kommentators het gesê hulle beplan om hul intekening op Newsweek te staak.
– Reuters Life!