TV-advertensies: Tiger nie meer tier
2009-12-10 23:54
- Artikelopsies
- Deel
- Kry Beeld op
New York. – Uitsaaiers keer Tiger Woods, een van die grootste handelsmerke ter wêreld, die rug toe. TV-advertensies waarin Woods verskyn, het verdwyn sedert nuus oor sy ontrouheid gebreek het.
Volgens die verbruikersnavorsingsfirma Nielsen het die voorheen alomteenwoordige Woods nog nie weer sedert 29 November se Gilette-advertensie op TV verskyn nie.
Dit was twee dae ná die motorongeluk buite sy huis in die Amerikaanse deelstaat Florida en die daaropvolgende onthullings van buite-egtelike verhoudings.
Berigte dat Woods moontlik onder die invloed van drank, ’n kalmeermiddel en ’n pynstiller was toe die ongeluk gebeur het, het die krisis laat verdiep.
Die laaste Gilette-advertensie het gewys tydens NBC se gewilde Football Night in America en het altesame agt keer in November gewys tydens voetbal-uitsendings, het ’n Nielsen-woordvoerder gesê. Sedertdien is Woods nog nie weer in die openbaar gesien nie.
Die enigste beeldmateriaal van die gholfspeler – wat verlede week aan sy eie toernooi onttrek het – was in prikkelende berigte oor sy sekslewe.
Borgskappe het Woods die eerste miljardêr van sport gemaak. Hy verdien ’n geraamde $110 miljoen (sowat R825 miljoen) jaarliks uit borgskappe en prysgeld. En solank hy aanhou wen, sal borge hom nie maklik heeltemal laat vaar nie. Maar Woods se aansien is besig om te daal.
Gatorade het gesê hulle gaan ophou om die Tiger Focus-drankie te maak. Hulle sê egter die besluit is gemaak voordat die skandaal uitgebreek het.
- Beeld