‘Top Gear’ se geheime jaer met hof se hulp ontmasker

Londen. – Top Gear se geheim is uit!

Die identiteit van The Stig, die geheimsinnige toetsbestuurder in dié gewilde BBC-program, is gister bekend gemaak nadat die uitsaaier ’n regstryd verloor het om sy naam dig te hou.

Ben Collins het sy renloopbaan in 1994 begin en al op Formule Drie-vlak deelgeneem.

Sy naam het op die lappe gekom nadat die hooggeregshof in Londen ’n tydelike hofbevel geweier het teen die bekendmaking van sy naam in ’n boek.

In elke episode van Top Gear jaag The Stig in kragtige vuurwaens rond, maar sy gesig word deur ’n wit valhelm en ’n swart gesigskerm verberg.

Die BBC het regstappe begin om die publikasie van ’n outobiografie deur Collins te keer waarin hy erken hy is die bestuurder.

Die uitsaaier het aangevoer Collins het ’n vertroulikheidsooreenkoms met die uitsaaier aangegaan en dat dit die program sal bederf as kykers weet wie hy is. Maar ná ’n dag van onderhandelinge agter geslote deure het regsverteenwoordigers van die uitgewer HarperCollins gesê die saak is in hul guns beslis.

Die uitgewer het gesê hy is teleurgesteld dat die BBC, ’n openbare uitsaaier, geld aan die regsaksie bestee het.

Andy Wilman, uitvoerende vervaardiger van Top Gear, het verlede week gesê die uitgewer probeer munt slaan uit die geheim en wil aanhangers se kykgenot só bederf.

“As jou Kersfees bederf word deur die bekendmaking van een van die onskuldigste raaisels op TV, weet net dat HarperCollins se base ’n lekker Kersfees het,” het hy gesê.

Hy is wel nie die eerste of enigste The Stig nie.

Die oorspronklike The Stig, Perry McCarthy, is in die pad gesteek nadat hy sy identiteit in ’n biografie in 2002 bekend gemaak het.


The Stig met en sonder sy masker!
Foto: AP

– Reuters