Vatikaan katnes van korrupsie, skryf hoof

Den Haag. – Die Vatikaan is ’n katnes van korrupsie en magsmisbruik.

Dít blyk uit briewe wat aartsbiskop Carlo Maria Vigano, sekretaris-generaal van die Vatikaanse regering, aan die pous geskryf en wat uitgelek het.

Die Europese media het die laaste paar dae baie aandag daaraan gegee, veral omdat Vigano ná sy briewe aan pous Benedictus XVI uit sy pos verwyder en as Vatikaanse ambassadeur na Washington gestuur is.

Dié onthulling is gedoen in ’n Italiaanse TV-program.

Die Vatikaan se reaksie was om die vervaardigers van die program se joernalistieke etiek te betreur, maar die bestaan van die briewe is nie ontken nie.

In die briewe lig Vigano die pous in oor die toestand wat hy in die Vatikaanse regering aangetref het toe hy in 2009 as regeringshoof van dié onafhanklike mini-staat aangestel is.

Hy sê hy het afgekom op ’n web van korrupsie en nepotisme in die toekenning van kontrakte.

In een van die briewe skryf hy kontrakte is dikwels aan dieselfde ondernemings toegeken teen pryse wat dubbel so hoog as dié van mededingers was.

Hy het byvoorbeeld agtergekom dat die Kersfees-stal wat op die plein voor die St. Pieterskerk opgerig is €550 000 (sowat R5,7 miljoen) kos, wat te veel is.

Die Vatikaan se geldsake is gehanteer deur ’n komitee van bankiers onder die voorsitterskap van mnr. Ettore Gotti Tedeschi, wat glo eerder na sy eie belange as na dié van die Vatikaan omgesien het.

Ander kardinale in die Vatikaan, het Vigano voorts geskryf, was goed op die hoogte van sake.