Vervoerskema-vrou dreig met selfmoord
2010-03-09 22:44
- Artikelopsies
- Deel
- Kry Beeld op
Die polisie probeer sedert Saterdag vasstel of die beweerde baasbrein agter ’n vervoerpiramideskema wel selfmoord gepleeg het nadat sy glo SMS’e aan verskeie mense gestuur het waarin sy met dié daad gedreig het.
Sou dit wel sy wees wat die SMS’e gestuur het, sal die polisie die hof vra om haar borgtog van R20 000 terug te trek.
Volgens insp. Cobus Vlok, ondersoekbeampte in die beweerde Tswella Facilitators- en Truckbond-piramideskemasaak, het me. Yolanda Visser glo Saterdag SMS’e aan verskeie vriende en familie gestuur waarin sy gesê het sy gaan selfmoord pleeg.
Volgens Vlok het Visser tydens aanhouding ook met selfmoord gedreig.
“Ek het Saterdagmiddag ’n SMS van iemand na aan die familie ontvang wat my ingelig het dat Yolanda aan baie van haar vriende en familie SMS’e gestuur en gesê het sy gaan haar lewe neem,” het Vlok gister aan Beeld bevestig.
Volgens Vlok het hy mnr. Visser, wat nie in dieselfde huis as sy vrou bly nie, gebel en dié het aan hom bevestig dat me. Visser wel SMS’e met selfmoorddreigemente aan hulle gestuur het.
Vlok het egter gesê dat hy me. Visser sedert Saterdag nog glad nie in die hande kon kry nie. Hy weet ook nie of sy wel haar dreigement deurgevoer het nie. “Sy het so baie selfoonnommers, daar is nie ’n manier dat ek haar in die hande kan kry nie.”
Die staat oorweeg dit om vandag ’n aansoek by die streekhof in Pretoria-Noord in te dien om me. Visser se borgtog in te trek.
Me. Visser, haar man, Conrad (35), en mnre. Abram Fourie (41) en Carl Uys (35) is vroeër in die hooggeregshof in Pretoria op borgtog vrygelaat nadat hulle geappelleer het teen streeklanddros Ben van Schalkwyk se weiering van hul borgtog in die streekhof.
Die Vissers, Fourie en Uys het die betrokke twee maatskappye van dieselfde perseel af bedryf.
Dié maatskappye het onder meer glo geld by mense geneem in ruil vir ’n vyfjaar-vervoerkontrak wat ’n maandelikse opbrengs sou lewer en ’n vragmotor wat ná vyf jaar die kliënt se eiendom sou word.
Mense het tussen R25 000 en R30 000 fasiliteringskostes betaal, maar dan glo nie hul vragmotors of kontrakte gekry nie.