Vir AU. Van China
2012-01-30 21:26
- Artikelopsies
- Deel
- Kry Beeld op
Addis Abeba. – Met liefde van China.
As die nuwe Afrika-Unie-hoofkantoor ’n toegedraaide geskenk was, sou dít op die kaartjie gestaan het.
Dit is ook die boodskap waarmee die Chinese regering die Afrika-Unie (AU) se nuwe hoofkantoor aan die AU-leierskorps oorhandig het.
Die gebou, wat $200 miljoen (sowat R800 miljoen) gekos het, is deur die Chinese regering gefinansier om te verseker dat die AU hom beter van sy taak kan kwyt, het mnr. Jia Qinglin, leier van die Chinese Konsultatiewe Raad, die naweek gesê.
Die nuwe hoofkantoor, wat 99 m hoog staan op 50 000 m2 en waar meer as 2 000 mense op ’n slag onthaal kan word, is die naweek ingehuldig op die AU-beraad wat deur dosyne staatshoofde bygewoon is.
Die gebou bestaan uit honderde kantore en koukuskamers vir afvaardigings en groot konferensiesale waar vergaderings gehou kan word.
’n Chinese staatskorporasie was verantwoordelik vir die bouwerk en oorwegend Chinese werkers is gebruik om te verseker die gebou kom in ’n rekordtyd klaar.
Die grond waarop die gebou is, is deur die Ethiopiese regering geskenk en ’n tronk is afgebreek om plek te maak vir die AU-gebou.
Hoewel daar groot sonpanele naby die helikopter-landingstrook is, was daar die laaste tyd baie elektrisiteitsonderbrekings in geboue om die nuwe hoofkantoor, het inwoners gekla.
Die hoofkantoor het ook drie gebedskamers, verskeie kleiner komiteekamers vir wegbreeksessies en ’n mediasentrum.
Die Chinese regering het nog $100 miljoen beloof vir die instandhouding van die gebou.
Chinese werkers was nog besig om die bouwerk af te handel toe die gebou oorhandig is.
Buite die gebou is ’n reuse TV-skerm wat daaglikse nuus van die Chinese Xinhau-nuusagentskap uitsaai.
Afrika-leiers het groot gewag gemaak van die goeie verhouding met die Chinese wat gelei het tot die groot geskenk.