Vrou sê sy het 8 babas vermoor

Lille (Frankryk). – ’n Vrou (47) het erken sy het agt van haar babas versmoor en hul lyke in die noorde van die land weggesteek, het ’n staatsaanklaer gesê.

Die vrou en haar man, ook in sy 40’s, is Dinsdag vir ondervraging ingeneem nadat die lyke in twee huise in die dorp Villers-au-Tertre gevind is.

Me. Dominique Cottres, ’n assistent-verpleegster, het ’n bekentenis afgelê dat sy sowat tien jaar gelede twee babas by geboorte vermoor het, het mnr. Eric Vaillant, staatsaanklaer, gesê.

Cottres het later erken dat sy nóg ses babas vermoor het.

“Sy wou nie nog kinders hê nie en wou nie enige dokters nader nie.” Die egpaar het twee dogters in hul 20’s.

Volgens Vaillant het Cottres getuig sy het nie haar man van die swangerskappe of die moorde ingelig nie.

Haar man, ’n timmerman, is vrygelaat.

– Reuters