Vroue en kinders in visnette gevang en doodgekap
2010-03-08 23:58
Jos. – Minstens 500 mense is eergister dood in skermutselings tussen lede van verskillende etniese en godsdiensgroepe naby dié stad in Sentraal-Nigerië.
“Ons kon daarin slaag om 95 mense te arresteer, maar meer as 500 mense is nogtans dood weens dié grusame optrede van Fulani-veewagters,” het mnr. Dan Majag, adviseur van die staatsgoewerneur, gister gesê.
Mnr. Goodluck Jonathan, waarnemende president van Nigerië, het veiligheidsmagte eergister op gereedheidsgrondslag geplaas nadat bendes hoofsaaklik vroue en kinders met pangas vermoor het in dorpies wat grootliks deur Christene bewoon word.
Ooggetuies het vertel hoe slagoffers in valstrikke en visnette gevang is terwyl hulle van hul aanvallers probeer vlug het. Daarna is hulle in ’n oënskynlik goed georganiseerde aanval doodgekap.
“Van die kinders (wat vermoor is) was jonger as ’n jaar,” het ’n staatsamptenaar gesê.
Van die geweld het eergister in die vroeë oggendure om die dorpie Dogo Nahawa, naby Jos, uitgebreek. Joernaliste het 103 lyke in die smeulende vuur daar getel.
Die aanvallers het ook tientalle huise in die dorpies Ratsat en Zot aan die brand gesteek.
“Die dorpe is aangeval deur Fulani-veewagters wat talle mense vermoor en huise aan die brand gesteek het,” het mnr. David
Daniel, ’n Ratsat-inwoner, gesê.
Ander inwoners en plaaslike menseregte-aktiviste het die Moslemse Fulani-groep ook die skuld vir die aanvalle gegee.
In Jos het mnr. Yusuf Alkali, ’n lid van die Fulani-groep, gesê hy glo die aanvalle is uitgevoer uit wraak vir die moord op vier veewagters twee weke gelede toe Berom-jeugdiges ’n Fulani-nedersetting aangeval het.
In Januarie is honderde mense in gevegte tussen godsdiensgroepe by Jos dood.
Getraumatiseerde inwoners het plaaslike amptenare daarvan beskuldig dat hulle tydens die jongste bloedvergieting anderpad gekyk het.
“Die aanval het omstreeks 03:00 begin en tot 06:00 aangehou, en hoewel daar geweerskote was, het ons nie ’n enkele polisielid gesien nie,” het mnr. Peter Gyang, wie se vrou en twee kinders vermoor is, in Dogo Nahawa gesê.