‘Wêreld skeep Somalië te lank af’

Die bomaanvalle op 11 Julie wat die lewe van meer as 70 WB 2010-geesdriftiges in Kampala geeis het, is ’n wekroep dat die hele Oos-Afrika ’n gevaarlike plek geword het.

So het mnr. John-nie Carson, Amerikaanse onderminister van buitelandse sake belas met Afrika, gesê.

Hy het gister op ’n internasionale elektroniese mediakonferensie vanuit die Ugandese hoofstad gesê die Somaliese terreurbeweging Al-Sjabaab “het daarmee getoon dat hy in staat is om selfmoordbomaanvallers na Uganda, Kenia, Tanzanië, Djiboeti en Ethiopië uit te voer of daar te werf en te aktiveer”.

Carson woon tans die leiersberaad van die Afrika-Unie (AU) in Kampala by waar Afrika-leiers gister onderneem het om Amisom, die AU-vredesmag in Somalië, met nog 2 000 troepe van Burundi en Guinee te versterk.

Hy wou nie kommentaar lewer op die moontlikheid dat Suid-Afrika ook soldate na Mogadisjoe sal stuur nie.

“Enige hulp wat Suid-Afrika kan aanbied, sal gewaardeer word. Suid-Afrika het ’n baie goeie geskiedenis in vredesendings in Afrika,” het hy gesê.

“Die veiligheidstemperatuur in Oos-Afrika het ná die 11 Julie-aanvalle aansienlik gestyg.

Ons het nie net meer te doen met vlugtelinge, seerowery en wapensmokkelary nie, maar nou met die koms van interna­sionale terreur na die vasteland.”

Carson het gesê die internasionale gemeenskap het die Somalië-probleem te lank afgeskeep.

“Somalië het ingeplof, daar is ’n skaars funksionele regering en lyding onder miljoene gewone Somaliërs.”

Dit lei daartoe dat tussen 5 000 en 6 000 Somaliërs maandeliks na Kenia vlug en groot druk op dié land plaas.